ماكينة تعبئة الارز والسكر الاتوماتيكية من شركة المهندس منسي
ماكينة تعبئة الارز والسكر الاتوماتيكية من شركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : لو سمحت بسأل على مكن تعبئة رز وسكر يكون مستعمل في حاجة متاحة؟
المهندس منسي : إن شاء الله
العميل : في حدود كام يا باش مهندس
المهندس منسي : إنت عايزها مستعملة؟
العميل : آه عشان إنت عارف الدنيا الأسعار وكل ما تكلم حد يقولك الدولار زاد، الدولار زاد، خلينا في المستعمل يمكن ربنا يكرم كده
المهندس منسي : هوه في عندنا سعرها 6
العميل : ده اللي هي المستعمل؟
المهندس منسي : لأ الجديدة
العميل : دي سعة كام يا باش مهندس؟ يعني بتعمل كام طن…
المهندس منسي : بتعمل في الدقيقة من 33-70 كيس، حسب اعتبارات حسب الإنتاج نفسه
العميل : حسب الإنتاج يعني تبدأ من كيلو ـ لغاية 5 كيلو
المهندس منسي : إنت عايز 5 كيلو؟
العميل : لأ بنسأل عشان لو كده أبقى عارف الدنيا بتبقى في حدود إيه، من باب العلم بالشيء، هي دي آخرها كيلو مثلاً أو 3 كيلو
المهندس منسي : لأ آخرها كيلو
العميل : بس أقل من الكيلو شغال
المهندس منسي : آه… في مكن بقى نص أتوماتيك بتعمل يعني ، وخلي بالك هنزود الأسعار 1 أكتوبر
العميل : ليه بقى ليه تاني، ده الدنيا ماشية كده بالزق، يعني ربنا ييسر الأحوال والدنيا تمشي
المهندس منسي : ما هو أنا هقولك ليه، أنا بقولك على أساس إن الدولار بـ 10جنيه، إحنا شركة عالمية، مش شركة مصرية، على مستوى العالم
العميل : ما أقصدش والله أنا بتكلم بس بقلب مفتوح مع حضرتك
المهندس منسي : ما هو أنا جاي لحضرتك أهوه، الدولار بره في السوق دلوقتي غير الدولار اللي إحنا بنحاسبه
العميل : أكيد طبعاً مصر كلها بتعاني من المشكلة دي
المهندس منسي : يعتبر كل مكنة بنبيعها بنخسر فيها 20%
العميل : ما بتعرفش تدخل زيها بنفس القيمة
المهندس منسي : أيوه… فكل مكنة دلوقتي بنبيعها بنخسر فيها حوالي 20%، فإحنا مش هنستمر في الخساير، فلما اجتمعنا قالوا خلاص نعتبر الخساير ديت وسيلة دعاية لينا لغاية ما نشوف هل الدولار هيستقر ولا هيطلع تاني ولا هينزل
العميل : ربنا يستر على الحال ده كله متكتف، إن شاء الله ربنا ييسر الحال والدنيا تنزل لأنه خلي بالك الغلو ده موقف الدنيا كلها، الدنيا كلها واقفة يعني الغلا ده مش في الصالح، اللي بيخرج شويه بضاعة عنده مش عارف هيجبهوم تاني ولا مش هيجبهم تاني
المهندس منسي : آه… كنا طامعين إنه ينزل، ما نزلتش
العميل : طب دي حضرتك إيطاليا الصنع ولا محلي؟
المهندس منسي : لأ هي بص يا سيدي، إحنا نظام إيه جديد شويه
العميل : تجميع
المهندس منسي : النظام بتاعنا إن إحنا بنجمعها في مصر، بنجيبها من عدد من البلاد ونجمعها في مصر، يعني مثلاً لما تقولي أنا عايز المواتير ألماني، بركبلك المواتير ألماني، براحتك، هي واقفة كده الماتور بتاعها صيني درجة أولى، فإنت تقولي مثلاً دلوقتي لأ شيل الماتور ده وحط الماتور ألماني
العميل : ما هو هيبقى على قلب الزبون الزبون اللي طالب زي ما بيقولوا
المهندس منسي : مش على قلبه ولا حاجة…
العميل : ما أقصدش يعني هوه على أد احتياجاته هوه
المهندس منسي : تصدق وتؤمن بالله
العميل : لا إله إلا الله
المهندس منسي : إن في اجتماعتنا لما نيجي نجتمع عشان نشوف إيه المشاكل اللي ممكن تتصلح، ولا ماتور لغاية دلوقتي بقالنا 10 سنين ولا ماتور غيرناه، 10 سنين
العميل : ده فضل ونعمة من ربنا الحمد لله
المهندس منسي : آه.. آه.. صيني درجة أولى، واخد بالك، ولا ماتور لغاية دلوقتي، طب خد اللي أنأح من كده
العميل : أيوه
المهندس منسي : جبنا مكن تي إن تي عشان خاطر السبير بازز اللي هتتفضل.. إحنا بقالنا في السوق 10 سنين فقلنا أكيد في قطع غيار عايزه تتبدل حاجات من دي، والله العظيم 3 مكنات واقفين ما استفتحنا عليهم، الـ 3 مكنات الـ تي إن تي واقفين ما استفتحنا عليهم حته
العميل : ربنا يبعت الخير
المهندس منسي : يعني كل المكن وكل قطع الغيار مافيش مشكلة فيه
العميل : يا مسهل الحال يا رب، الناس مش عاوزه غير كده إن الدنيا تمشي
المهندس منسي : الحمد لله وفضل من ربنا
العميل : طب والمستعمل بيبقى ظروفه إيه يا باش مهندس، يعني بالتقريب كده بيبقى في رينج كام، معلش برده إدينا فكرة كده بس
المهندس منسي : أنا ماليش في المستعمل، عشان كده ما أعرفوش، ولكن في واحدة مستعملة كنت أنا واخدها كده مساعدة من واحد، كنت عايز أسعاده، فكان عنده واحدة مستعملة فزي ما تقول أخدتها منه اللي هوه عايز أبيعله
العميل : هتعمل إيه بس الدنيا كلها على ده الحال، ربنا يسترها من عنده والله
المهندس منسي : فروح اتفرج عليها وقدر تمنها وقولي أنا هاخدها بكذا
العميل : معلش إديني إنت برده نورني…
المهندس منسي : أنا يعلم ربنا لو كنت عارفلها سعر لكنت مريحك وقايلهولك، إنت روح قله…
العميل : يعني هوه مش حاطط رقم معين، معلش إنت برده رايح المشوار عارف اللي في جيبك هيمشي كتير قليل
المهندس منسي : ما تقلقش.. ما تقلقش خالص
العميل : إنت عارف الدنيا ماشية إزاي اليومين دول، طمني بس قولي الرينج هيبقى بكام يعني الدنيا بتتكلم في إيه؟
المهندس منسي : سيبها لله.. سيبها لله ما تقلقش خالص، إنت كل اللي عليك والله أنا المكنة دي هقيمها بسعر كذا، وربنا ييسر ما تقلقش
العميل : طب دي حضرتك أتوماتيك ولا نص أتوماتيك ولا إيه؟
المهندس منسي : بس لسه عايزه تتشد بقى، ومش أنا اللي بشدها لأني ما بشتغلش في المستعمل، هي محطوطة بقالها سنتين دلوقتي، فإنت تستفاد منها أحسن من حطتها
العميل : ربنا يفرجها على الناس كلها يا باش مهندس، طب بقول لحضرتك هوه النص أتوماتيك دوت بيفرق إيه عن الأتوماتيك؟ في قفل الكيس بقى ولا في التعبئة نفسها ولا في إيه بالضبط
المهندس منسي : قفلة الكيس واحدة، طريقة القفل واحد، بس تفرق في إن هوه إنت بتحتاج عامل واحد قاعد تحتيها هوه ده اللي بيعتمد عليه الإنتاج
العميل : بمعنى إيه معلش الحتة دي بس عشان…
المهندس منسي : بمعنى إن سرعته هي سرعة المكنة
العميل : يعني هوه بياخد الكيس اللي نازل من المكنة، بيلم على جنب ولا بيقفله ولا…
المهندس منسي : لأ.. لأ.. بياخد الكيس اللي بينزل من على المكنة بيحطه على سير بس، ودي وظيفته، إن هوه ياخد الكيس يحطه على سير، السير ده بيعمل إيه؟؟؟ السير ده بيلحم الكيس ويودي الناحية التانية
العميل : آه… مش أكتر من كده
المهندس منسي : فسرعته هي سرعة المكنة
العميل : بمعنى إنه لو لاحق على الأكياس دي بيهدي الدنيا أو يسرع الدنيا على حسب دنيته ماشي إزاي
المهندس منسي : مضبوط آه
العميل : طب هوه في الحالة دي يا باش مهندس معلش أنا آسف مطول على حضرتك يعني، أنهي الأفضل إن المكنة يبقى نازله منها كده إن هي تقفل الكيس ولا الأفضل إن واحد ينقل على سير الناحية التانية، يعني جودة القفلان نفسه بتختلف أكيد طبعاً….
المهندس منسي : لا.. لا.. لا زي ما هي، لأنها بتتعمل على مكنة اسمها لحام مستمر
العميل : آه.. يعني الدنيا ما تفرقش كتير
المهندس منسي : مع المهندس منسي كل الشغل النص أتوماتيك زي الأتوماتيك، الـ 2 زي بعض
العميل : يا مسهل يا رب
المهندس منسي : دي رسالة بأديها، أجيب الصغير أحطه في صف واحد جنب الكبير وأقوله عليك إنك تتحرك
العميل : على أد ما تقدر
المهندس منسي : لإزالة الحقد الاجتماعي، لأنه كله بيقولك إيه؟؟؟ يا عم مش عارف إيه ده همه معاهم إمكانيات إنما إحنا مش هنلاقي، لأ جبتلك أنا الإمكانيات بتاعتهم، وإنت بقى اثبت العكس
العميل : آه شد حيلك بقى
المهندس منسي : آه ورينا بقى
العميل : عملنا اللي علينا، ربنا ييسر الحال إن شاء الله وتبقى معرفة خير يا باش مهندس، أنا متشرفتش بمعرفة حضرتك باش مهندس منسي مش كده؟
المهندس منسي : المهندس منسي معاك
العميل : ده حضرتك يزدنا شرف يا باش مهندس وإن شاء الله معرفة خير بأمر الله وربنا كريم إن شاء الله، وكتر ألف خيرك يا باش مهندس، شكراً يا بيه، شاكرين أفضال سعادتك، أي أوامر
المهندس منسي : ما أتحرمش منك يا غالي
العميل : شكراً يا بيه كتر خيرك، في أمان الله يا باش مهندس، مع السلامة