ماكينة تعبئة وتغليف التوفي واللبان من شركة المهندس منسي
ماكينة تعبئة وتغليف التوفي واللبان من شركة المهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : شركة المهندس لمكن التغليف
المهندس منسي : أيوه إن شاء الله
العميل : لو سمحت المكنة اللي معروضة على النت اللي هي وزنها 2 كيلو جرام ديت أو 20 كيلوجرام مش فاكر
المهندس منسي : مكنة إيه؟
العميل : مكنة التغليف اللي بتغلف وتعمل تاريخ الإنتاج
المهندس منسي : هتغلف إيه؟
العميل : هغلف أكياس مواد غذائية، يعني توفي ولبان ومصاصة وكلام من ده
المهندس منسي : آه.. آه… في منها نص أتوماتيك وفي منها أتوماتيك كامل؟
العميل : مش وزنها قصدك بتوزن لغاية كيلو ولاهي وزنها كام؟
المهندس منسي : هي وزنها مش وزن المكنة، إنت قصدك الوزن اللي بتعبيه المكنة
العميل : هوه أنا اللي بعبي وهي بتلحم ولا…
المهندس منسي : دي النص أتوماتيك بتعبي وبعدين بتاخد منها الكيس…
العميل : يعني هي بتعبي وبتلحم وتطبع تاريخ الإنتاج؟
المهندس منسي : ما هي النص أتوماتيك بتعبي بس، أما الأتوماتيك هي اللي بتعبي وتلحم وتفصل الكيس وتعمل تاريخ الإنتاج وكل حاجة
العميل : طيب الأتوماتيك بكام والنص أتوماتيك بكام؟
المهندس منسي : النص أتوماتيك ب والأتوماتيك بـ
العميل : لا كلمنا في المصري إحنا هنتعامل بالدولار
المهندس منسي : لا عادي أنا بسمي بس بالدولار إنما هاخد منك بالمصري، يعني أنا بسميلك بس بالدولار عشان إنت عارف الدنيا عماله تعلى علينا وكده يعني بس
العميل : طب ما هو لما آجي أشتري أجيب دولار منين؟
المهندس منسي : لأ اشتري بالمصري عادي، ما ينفعش يا ابن عمي أقولك هات دولار، ده إنت تروح تشتكيني، بس أنا بسميلك بس بالدولار
العميل : يعني النص أتوماتيك ب، والأتوماتيك خالص بـ
المهندس منسي : آه
العميل : يعني النص أتوماتيك بألف وبتعبي
المهندس منسي : آه بتعبي بس
العميل : آه ..إنما الأتوماتيك بقى بتعمل إيه؟؟؟
المهندس منسي : بتعبي وتفصل الكيس وتلحم وتعمل كل حاجة ،يعني دلوقتي بس خليك معايا واحدة واحدة، اللي بتعبي بتعبي وتلحم الإيه بقى؟
العميل : النص أتوماتيك
المهندس منسي : لا بتعبي بس
العميل : ما بتلحمش
المهندس منسي : آه ما بتلحمش، تاخد بقى إنت إيه؟؟؟ تاخد جنبها سير لحام
العميل : يعني هي ممكن تعبيلي كام كيس في الساعة كده مثلاً، أو تعبي أد إيه؟
المهندس منسي : تعبيلك طن ـ طن ونص في الساعة
العميل : طب أنا دايخ على سكر بتاع مصاصة أي حاجة تتعبى
المهندس منسي : إن شاء الله
العميل : فرع الشركة فين يا باشا؟
المهندس منسي : إحنا عندنا حدائق القبة، مدينة نصر، باب الشعرية، 6 أكتوبر
العميل : باب الشعرية اللي جنب العتبة ده
المهندس منسي : آه…
العميل : تمام يا ريس، اللي هو في الشارع اللي بين الحارات
المهندس منسي : ما أعرفش أنا جنب إيه؟
العميل : حضرتك في باب الشعرية فين بالضبط يعني؟
المهندس منسي : باب الشعرية جنب العتبة
العميل : تمام يا باشا، في عندك مكن تاني غير التعبئة
المهندس منسي : آه.. عندي مكن تغليف كله، ومكن بلاستيك، عندي حاجات كتيرة قوي
العميل : شنط بلاستيك يعني؟
المهندس منسي : لأ، مكن بلاستيك الحقن، ومكن بلاستيك هوه إنت لسه ما تعرفش المشروع اللي إنت عايزه إيه؟
العميل : لأ أنا شغال في المواد الغذائية
المهندس منسي : طب خلاص…
العميل : ما هو أنا عارف أنا قلت حاجة جنب حاجة تزود الدخل يعني…
المهندس منسي : لا.. لا.. ركز نفسك في حاجة واحدة عشان خاطر تستفاد وجودتها أحسن
العميل : تمام يا ريس.. تمام
المهندس منسي : ماشي
العميل : ماشي يا بيه، بقول لحضرتك معلش
المهندس منسي : قول
العميل : هوه أنا بحطلها البكرة وهي تعمل الكيس
المهندس منسي : اللي هي الأتوماتيك أيوه
العميل : النص أتوماتيك ما بتعملش كده؟
المهندس منسي : آه… هوه إيه اللي جنبك بيطرطش ده؟ إنت قاعد جنب إيه
العميل : ها؟؟
المهندس منسي : في جنبك صوت بيطرطش كده
العميل : أنا سايق العربية يا باشا
المهندس منسي : آآآآه سايق العربية، ماشي يا غالي
العميل : بقول لحضرتك النص أتوماتيك دي لما أحب أحطلها أكياس أو أحط في الأكياس حاجة مثلاً أحط الأكياس إزاي؟؟
المهندس منسي : ما هو إنت بتروح ماسك الكيس ومناوله ليه، هي بعد ما تناولها تروح معبياه
العميل : تمام يا باشا، ألف شكر
المهندس منسي : ماشي يا غالي
العميل : معلش يا ريس تعبناك معانا
المهندس منسي : ولا يهمك يا غالي
العميل : ماشي يا باشا شكراً