ماكينة تعبئة أكياس سكر 5 كيلو نصف أتوماتيك كود 904 ماركة مهندس منسي
ماكينة تعبئة أكياس سكر 5 كيلو نصف أتوماتيك كود 904 ماركة مهندس منسي
المهندس منسي : السلام عليكم.
العميل : عليكم السلام ورحمة الله وبركاته ، يا بشمهندس .
المهندس منسي : أهلا بيك .
العميل : أخبارك إيه ؟
المهندس منسي : الحمد لله .
العميل : و الله أنا كنت عايز أسأل على مكن التعبئة والتغليف؟
المهندس منسي : آه .
العميل : يعني بتبقى إمكانياته إيه؟ و بكام ؟
المهندس منسي : المكن ده حاجات كتيرة أوي يعني فيه مكن نص أوتوماتيك، و أوتوماتيك وهتعبي إيه ؟ وهتغلف إيه ؟ كل الحاجات دية
العميل : اللي هي بتاعة تعبئة السكر .
المهندس منسي : آه
العميل : اللي هي بتعبي مثلا من ربع كيلو لحد خمسة كيلو .
المهندس منسي : لا بص يا سيدي ، اللي هتعبي ربع كيلو تقدر تعبي كيلو .
العميل : آه .
المهندس منسي : إنما الخمسة كيلو دية مكنة تانية خالص .
العميل : يعني اللي تعبي ربع كيلو تعبي لحد كيلو لكن متعبيش خمسة ؟
المهندس منسي : آه لا اللي تعبي خمسة كيلو دية بتبقى نص أوتوماتيك والاتوماتيك مليانة مشاكل.
العميل : نص أوتوماتيك والنص أوتوماتيك مليانة مشاكل يعني .
المهندس منسي : لا النص أوتوماتيك مافيهاش مشاكل.
العميل : الأوتوماتيك هي اللي فيها مشاكل يعني ؟
المهندس منسي: الأوتوماتيك الخمسة كيلو بتبقى مش مظبوطة علشان خاطر الخمسة كيلو تقيلة عليها يعني .
العميل : آه
المهندس منسي : ركز أنهي اللي أنت محتاجها بالظبط ؟
العميل : يعني برضه إديني فكرة برضه .
المهندس منسي : الفكرة في دماغك و شوف الدنيا فيها إيه
العميل : إديني فكرة عن الأسعار .
المهندس منسي : أسعار إيه بقى ؟ مهو أنا لازم أرسى على حاجة علشان أعرف أقول سعر.
العميل : نعم ؟
المهندس منسي : يعني لازم تقولي أنت عايز أي مكنة علشان أقول سعرها.
العميل : و الله أنا لسه هسأل كده ، وعايز اعمل مشروع اللي هو بتاع التعبئة ده .
المهندس منسي : فيه مكنة نص أوتوماتيك عاملة 12 ألف جنيه.
المهندس منسي : يعني 12 ألف جنيه .
العميل : دي نص أوتوماتيك ؟ دي بتعبي إيه و إيه؟
المهندس منسي : بتعبي كل حاجة كل اللي يقابلها.
العميل : لا يعني تعبي بالنسبة للوزن بتعبي أد إيه ؟ يعني من ربع كيلو ؟
المهندس منسي : من خمسين جرام لغاية كيلو.
العميل : لغاية أد إيه ؟
المهندس منسي : لغاية كيلو .
العميل : لحد كيلو ، طيب تعبي مثلا الطن في أد إيه ؟
المهندس منسي : ساعة.
العميل : الطن يتعبا في ساعة؟ يتعبا و يتغلف ؟
المهندس منسي : أنت حضرتك هتحط لها الكيس .
العميل :آه.
المهندس منسي : وبعد ما تحط لها الكيس هي تعبيه .
العميل : تمام ، بتعبيه و بتقفله ولا بتعبيه بس ؟
المهندس منسي : بتعبيه بس .
العميل : بتعبيه بس ، يعني بتحتاج حاجة تانية تقفله ؟
المهندس منسي: آه جنبه مثلا يا دوب تناولها الكيس هي تاخده تلحمه و توديه الناحية التانية دي عاملة ألفين جنيه يعني .
العميل : لكن مفيش مكنة بتعمل الاتنين تعبي و تقفل ؟
المهندس منسي : آه فيه مكنة أوتوماتيك كاملة تعبي وتقفل وتعمل كل حاجة دي عاملة 6 .
العميل : تعمل كام ؟
المهندس منسي : 6 .
العميل : طب ماشي بالمصري بقى يعني كام ؟ 60 ألف ؟
المهندس منسي : يعني .
العميل : امم ، طب دي صناعة إيه ؟
المهندس منسي : دي ماركة، ماركة المهندس منسي .
العميل : ماركة إيه ؟
المهندس منسي : ماركة المهندس منسي ، دي ماركة ماركة متسجلة في وزارة الصناعة إن دي ماركة .
العميل : آه يعني صناعة مصري .
المهندس منسي: لا ، قطع غيارها بره ومتجمعة هنا في مصر و أغلب قطع غيارها من بره .
العميل : آه ، طيب زي ما حضرتك برضه بتقول كده لازم الواحد يجي ويشوف اللي هو عايزه إيه ونتكلم إن شاء الله طيب انتو بتبقوا فاتحين من الساعة كام ؟
المهندس منسي : فاتحين هنا من 11 لـ 9 .
العميل : من 11 لـ 9 بالليل ، طيب ماشي ، ماشي يا باشا شكرا .
العميل : ما تعرفتش باسم حضرتك بقى .
المهندس منسي : مهندس منسي .
العميل : يا أهلا .
المهندس منسي : هبعت لك تليفون المبيعات علشان تتابع معاهم .
العميل : نعم ؟
المهندس منسي : هبعت لك تليفون المبيعات علشان تتابع معاهم .
العميل : طيب تمام ، ماشي يا ريس ، شكراً ، متشكرين جدا يا باشا شكراً .