ماكينات تعبئة حبوب وبقوليات من شركة المهندس منسى
ماكينات تعبئة حبوب وبقوليات من شركة المهندس منسى
العميل: السلام عليكم
المهندس منسى: عليكم السلام ورحمة الله وبركاته
العميل: ألو…
المهندس منسى: أيوه عليكم السلام ورحمة الله وبركاته
العميل: يا باشا إزي حضرتك
المهندس منسى: الحمد لله نحمد ربنا ونشكر فضله
العميل: لو سمحت شركة المهندس منسي
المهندس منسى: معاك يا باشا
العميل: لو سمحت حضرتك كنت محتاج عروض أسعار ماكينات تعبئة وتغليف، وكنت محتاج عروض أسعار لماكينات بلاستيك، صناعة بلاستيك
المهندس منسى: آه يعني كام مكنة مثلاً؟
العميل: أنا لسه بعمل دراسة جدوى لمشروع ومطلوب مني لأن إحنا لسه بنختار ما بين 2، ما بين البلاستيك وبين التغليف والتعبئة
المهندس منسى: آه…
العميل: ماشي، فأنا لسه المطلوب مني إيه ما أعرفوش، لأن وزارة الصناعة ما حددتش معايا أي حاجة، أنا عموماً المهندس عمرو الألفي من دمياط
المهندس منسى: أهلاً بيك
العميل: أنا كنت من فترة كلمت حضرتك أو حد من عند حضرتك، كان في حد بطاقته كانت ضايعة أو حاجة زي كده بستعلم عليها لو تفتكر
المهندس منسى: آه
العميل: فحضرتك أنا بعمل الموضوع ده ومحتاج عروض أسعار عشان دراسة جدوى
المهندس منسى: هوه عموماً الموقع بتاعنا عليه كل مكنة تحتها موجود عليها سعرها
العميل: الماكينات دي تصنيع حضرتك ولا استيراد؟
المهندس منسى: ده يعتبر ماركة، يعني لا تصنيعي ولا استيراد، ماركة، براند عالمي، يعني إحنا بنصمم قطع الغيار ونبعتها بره تتصنع وبعد كده نجمعها
العميل: يعني في النهاية مصرية
المهندس منسى: تعتبر مصرية لو عايزها أوروبية ماشي…
العميل: أنا ماعنديش مانع، أنا أشتريها من مصر، أنا ماعنديش مشكلة، لكن المشكلة في حاجة عايز أعرف إيه المطلوب أو بالضبط كبداية مشروع مثلاً تعبئة وتغليف
المهندس منسى: هي مش تعتبر مصرية ولا حاجة، هي تعتبر مستوردة ومتقفلة في مصر، يعني ماركة زيها زي توشيبا، زيها زي تويوتا.. الحاجات دي كلها دي متقفلة في مصر….
العميل: صيانتها وقطع غيارها وحاجتها متوفرة من خلال حضرتكم طبعاً
المهندس منسى: آه.. آه.. آه إحنا مش تجار إحنا مصنعين، فإحنا بنصنع حاجات بره وبعد كده بنجمعها
العميل: يعني طبعاً شركة المهندس منسي
المهندس منسى: مضبوط آه
العميل: تمام… أنا ماعنديش مشكلة، أولاً وأخيراً أنا ما أعرفش غير المكنة باسم حضرتك، أنا دخلت لقيت المهندس منسي وكام شركة الهدى كذا.. كذا… اخترت أنا دي، أنا خلاص حتى ربنا كرم إن شاء الله هاجي لحضرتك وهنتقابل
المهندس منسى: إن شاء الله
العميل: ولكن أنا محتاج عروض الأسعار… بالنسبة لعروض الأسعار اللي موجود تحت الماكينات
المهندس منسى: آه خش بس أي موقع هتلاقي كل موقع هتلاقي أي مكنة تحتيها عرض بتاعها
العميل: أي موقع ولا موقع حضرتك؟
المهندس منسى: لأ أنا قلتلك خش أي موقع إزاي بقى؟؟؟ بقولك خش موقعي أنا
العميل: ما هو حضرتك بتقولي أي موقع
المهندس منسى: آه أي موقع من مواقعنا لأنه إحنا عندنا عدد من المواقع
العميل: تمام… تمام… تمام… يعني باخد أنا الأسعار دي، هي عموماً هتبقى حبوب ورز وعدس، بقوليات كده يعني، المطلوب مني إيه؟؟؟ أنا مش عارف هحتاج مكن إيه؟ أنا وزارة الصناعة ما وجهتنيش في المشروع أنا هحتاج إيه؟
المهندس منسى: ما هو أنا مش مكتب دراسة جدوى، أنا كل العملية إنك بتقولي أنا عايز عرض أسعار من عندك بديلك عرض الأسعار بتاعي بس، فبدل ما إنت تيجي وتاخد عرض أسعار ومش عارف إيه إنت بتطبع بيه من على النت وهي فيها سعرها وفيها كل حاجة
العميل: بالضبط تمام، مافيش مشكلة، مكان حضرتك في الجيزة ولا فين؟
المهندس منسى: أنا في القاهرة، عندنا حدائق القبة، مدينة نصر، باب الشعرية، 6 أكتوبر
العميل: خلينا في حدائق القبة، فين في حدائق القبة؟
المهندس منسى: اكتب عناوين شركة المهندس منسي هتلاقيها موجودة قدامك على الإنترنت
العميل: أنا من منشية الصدر، أصل العيلة…
المهندس منسى: ما هو أنا صعب عليا أوصفلك العنوان، مش عارفه قوي، هوه شارع اسمه شارع الخليج
العميل: ماشي.. ماشي…،هوه اسمه شارع الخليج كده يعني،الخليج ولا الخليفة؟
المهندس منسى: الخليج، ريح دماغك وخش اكتب عناوين شركة المهندس منسي
العميل: حاضر والله أنا عايز اريحك وآجي لحضرتك
المهندس منسى: تيجي تنورني
العميل: يعني عايز آخد الأسعار دي… يعني أنا مش هجيب أسعار تانية، أنا مش محتاج مقارنة أسعار… أنا دخلت على اسم المهندس منسي بس مش أكتر، أنا عايز آخد الأسعار
المهندس منسى: تنورنى
العميل: ربنا يخلي حضرتك، آخد الأسعار أديها للمحاسب وأتوكل على الله وآجي لحضرتك
المهندس منسى: إن شاء الله
العميل: بس إن شاء الله مجيي لحضرتك يعني 11 أو 12/3 إن شاء الله
المهندس منسى: تيجي تنورني
العميل: ربنا يبارك في حضرتك، ماشي فخير إن شاء الله يمكن تكون فرصة للتعامل مع بعض بإذن الله
المهندس منسى: إن شاء الله
العميل: ماشي يا فندم آسفين على الإزعاج وشكراً
المهندس منسى: مع السلامة