مكنة تعبئة بودر زراعي نص أتوماتيك من شركة مهندس منسي
مكنة تعبئة بودر زراعي نص أتوماتيك من شركة مهندس منسي
المهندس منسي: السلام عليكم.
العميل: وعليكم السلام ورحمة الله وبركاته، شركة المهندس؟
المهندس منسي: أيوة.
العميل: أيوة يا باشا معاك المهندس أحمد شركة “جلوبال جرين بلانت”.
المهندس منسي: أهلا و سهلا.
العميل: أهلا بيك كان لسه فيه حد من عندي من المكتب مكلم حضرتك بخصوص مكنة تعبئة بودر.
المهندس منسي: آه.
العميل: بس هو قال لي، إن المكنة النص أوتوماتيك بـ بس أنا مش فاهم يعني إيه أصلا عايز حد يشرح لي يعني إيه النص أوتوماتيك أصلا ؟
المهندس منسي: نص أوتوماتيك يعني بتعبي لك في الكيس وفيه مكنة تانية يبقى العامل واقف ياخد منها ويحط على المكنة التانية.
العميل: المكنة اللي بتقفل بقى .
المهندس منسي: أيوة.
العميل: آه المكنة دية ممكن تبقى مكنة بتخيط أو مكنة لحام صح؟
المهندس منسي: أيوة مظبوط آه.
العميل: آه طب و مكنة اللحام بقى بكام و إحنا اخدنا المكنة النص أوتوماتيك دي وخدنا معاها مكنة لحام منفصلة بكام بقى؟
المهندس منسي: فيه حاجة بـ، فيه حاجة بـ يعني ألفين جنيه مصري.
العميل: تمام.
المهندس منسي: و فيه حاجة بـ 600 لو أنت عايز تنفخ الشيكارة؟
العميل: آه لو أنت عايز تنفخ قبل ما تلحم؟
المهندس منسي: أيوة.
العميل: تمام تمام أنا كده فهمت.
المهندس منسي: و فيه مكنة تانية بـ يعني 3 آلاف جنيه مصري.
العميل: تمام.
المهندس منسي: لو أنت عايز تدخل الشيكارة رأسية .
العميل: طب جميل خلاص، هو المعرض بتاع حضرتك موجود فيه المعدات معروضة ولا بيبقى فيه كتالوج.
المهندس منسي: آه معروضة آه.
العميل: تمام تمام.
المهندس منسي: بص حضرتك علشان هما الفكر عندهم هيبقى ضيق شوية أنت كل اللي عليك و أنت رايح بس قول لهم عايز أشوف المكنة الوزنية النص أوتوماتيك اللي على الكيلو.
العميل: فين بقى أروح مدينة نصر؟
المهندس منسي: وات إيفر براحتك المكان اللي يعجبك.
العميل: آه أقصى وزن تعمله أد إيه المكنة دي؟
المهندس منسي: مهو بص حضرتك هي كل العملية إن هو لما قال لي 5 كيلو فا أنا دماغي قالت إن إحنا نجيب 5 مكنات 5 كيلو و ناخد منهم قمع ينزل لنا الخمسة كيلو في ضربة واحدة فهمتني؟
العميل: آآآه يعني حضرتك هي المكنة هما 5 ماكينات و كل مكنة بتطلع كيلو.
المهندس منسي: آه الخمس ماكينات دول هنروح عاملينهم وحدة واحدة مجموعة مع بعضها بلوك واحد هتروح ضارب الضربة هتروح منزلة لك، افرض أنت دلوقتي عايز تعايرها على 2 كيلو ونص ولا حاجة تقدر تحط 500 500 500 طب لو عايز تعايرها تلتميات تنزلك في الآخر كيلو ونص ولا حاجة لو عايز تخليها .
العميل: طيب حضرتك معندكش مكنة بتعبي 5 مرة واحدة؟
المهندس منسي: ما هو المكنة اللي بتعبي 5 كيلو هي هي المكنة اللي بتعبي كيلو و الله بس هي كل العملية.
العميل: آه.
المهندس منسي: إنها رؤوس جنب بعضها رؤوس بتتركب جنب بعضها.
العميل: آه يعني هي فالآخر هي نفس الكونست يعني مفيش فرق .
المهندس منسي: آه هي هي مكنة 10 رؤوس مكنة 5 رؤوس مكنة 3 رؤوس .
العميل: آه طب خلاص يبقى أنا كده أظبط معاد وأروح إن شاء الله أبص على المكن في المعرض بإذن الله.
المهندس منسي: إن شاء الله.
العميل: إن شاء الله ماشي يا فندم شكرا السلام عليكم .
المهندس منسي: عليكم السلام ورحمة الله و بركاته.