مكنة تعبئة البقوليات النصف اوتوماتيك من شركة المهندس منسي
مكنة تعبئة البقوليات النصف اوتوماتيك من شركة المهندس منسي
العميل : سلام عليكم
مهندس منسي : عليكم السلام ورحمة الله وبركاته
العميل : لو سمحت كنت عايز أسأل على مكنة تعبئة وتغليف نص أتوماتيك
مهندس منسي : آه هتعبي إيه؟
العميل : بقوليات
مهندس منسي : آه موجودة آه عامله 10500
العميل : دي تقفيل مصري مش كده؟
مهندس منسي : آه مستوردة تقفيل مصري
العميل : طيب أستأذنك كنت عايز عرض سعر بيها؟
مهندس منسي : لا ما بنطلعش عروض أسعار، عرض سعر على مكنة هتدفع عربون هنطلعلك عرض سعر
العميل : طب ماشي المكان طالب كده، المكان اللي أنا فيه طالب عرض سعر
مهندس منسي : آه خلاص خليه يستنى بقى
العميل : هتبعتهولي على الفاكس ولا على الميل؟
مهندس منسي : لا والله ما بنطلعش عروض أسعار إلا بناء على العربون
العميل : آه… يعني ما ينفعش تطلع.. ما أنا عشان أقدر أطلع الفلوس ما عايز أقولهم…
مهندس منسي : لا قولهم والله الشركة ديت بتقدم المكنة دي بـ 10500، واخد بال حضرتك بس كده
العميل : آه.. آه… طيب ماشي، يعني مش هينفع تديني عرض سعر
مهندس منسي : آه هوه عروض الأسعار كتير قوي بنلاقي نفسنا عمالين نطلع عروض أسعار وبس
العميل : ما هو….
مهندس منسي : ما هو أنا دلوقتي بذلت مع حضرتك مجهود، في مقابل إيه؟؟؟ في مقابل وعد بالشرا؟؟؟!!!!!
العميل : آه…
مهندس منسي : أنا المفروض إن أنا سياسة شركتنا إن أنا ببذل مع حضرتك مجهود بمقابل مادي
العميل : ماشي ما.. يعني ما هو لازم تديني عرض سعر عشان أقول المكنة دي بكذا، يعني هوه حاجة بتقول المكنة دي بكذا، عشان ما أجيش بعد كده تقولي لأ ما قلتلكش كده
مهندس منسي : آه لأ ما هوه…. هقول كده ليه
العميل : لا أصل معلش ده تعاقد يعني، إنت بتقولي كذا خلاص أديني الكلام اللي قولته، عشان بعد كده لما يجيي ….
مهندس منسي : لا دي موجودة بضاعة حاضرة تشيل وتحط، الكلام ده لما أكون لسه هجيب، إنما دي بضاعة حاضرة…
العميل : ماشي ما إنت هتكتبلي كده، بضاعة حاضرة
مهندس منسي : صلي على النبي قول عليه الصلاة والسلام
العميل : عليه الصلاة والسلام
مهندس منسي : لما حضرتك تتفضل مشكوراً عايز تروح تجيب تلاجة أو غسالة، حضرتك هتقوله عات عرض سعر عشان أروح أقول للمدام الإدارة…
العميل : لأ شركة لا شركة مش بيت، شركة تختلف عن البيت
مهندس منسي : هوه عموماً حضرتك إحنا ما بنطلعش عروض أسعار، عروض الأسعار بتطلع بناء على عربون، إحنا أرخص سعر في العالم
العميل : ماشي يا باشا أنا على دماغي من فوق، بس معلش هوه سيستم محطوط…
مهندس منسي : لا
العميل : طب يعني كنا نتمنى نتعامل معاك والله حتى…
مهندس منسي : الله يبارلك ده شرف لينا
العميل : ماشي شكراً يا باشا مع السلامة