مشروع تعبئة وتغليف السكر من شركة المهندس منسي
مشروع تعبئة وتغليف السكر من شركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : لو سمحت يا باشا شركة المهندس منسي
المهندس منسي : أيوه
العميل : لو سمحت كنا عايزين أعمل مصنع تعبئة وتغليف، وكنت حضرتك جيت لحضرتك من سنتين كده المؤتمر بتاع التسويق اللي هوه كان في القاهرة
المهندس منسي : آه
العميل : فكنت طبعاً جايب شويه كتالوجات من حضرتك وكده، فأنا بدأت نظمت المكان وجهزته يعني بالنسبة للمبنى، فحضرتك يا باش مهندس عايز أبدأ الشغل حالياً دلوقتي وعايز أشوف إيه المكن اللي ممكن يعني أبدأ بيه
المهندس منسي : هوه اللي إنت هتعبيه إيه؟
العميل : هوه أنا بداية كده عايز أبدأ بالسكر والزيت ولو أمكن الشاي، بس الشاي بقى مش عارف المكان مجايبه منين، أنا أعرف مكان السكر عندنا مصنع هنا في كفر الشيخ اللي هوه في الحامول، أما الشاي مش عارف مكانه فين
المهندس منسي : هوه الشاي تستورده أفضل من إنك تشتريه
العميل : ماشي بس أنا معنديش إمكانيات إن أنا أستورد حالياً يعني
المهندس منسي : عايز تشتريه يعني
العميل : آه
المهندس منسي : إحنا عندنا في المنصورة ناس كتير جداً مستوردين للشاي
العميل : في المنصورة؟
المهندس منسي : آه.. هوه إنت مش من المنصورة؟
العميل : أنا من كفر الشيخ، يعتبر دقهلية برده، مش بعيد عن المنصورة
المهندس منسي : لأ الدقهلية اركب ديرة وبعد ديرة انزل على المنصورة هتبص كتييييير قوي اللي بيستوردوا الشاي
العميل : تمام… يعني هوه كله بيسترده ويعبوه لحسابهم ولا همه بيبيعوا …..
المهندس منسي : في اللي بيستورد ويعبي لحسابه، وفي اللي بيستورد ويبيع
العميل : حضرتك يا باش مهندس عندنا من المنصورة؟
المهندس منسي : أنا أساساً من الدقهلية آه، من قرية تبع ميت غمر اسمها ميت مسعود
العميل : طب كويس يعني مش هتورطنا في حاجة إن شاء الله
المهندس منسي : لا مش هورطك ومش هورط أي حد الحمد لله وبفضل من ربنا يعني بدأتها بضمير، أنا صاحب رسالة مش لازم عشان أكسب من الناس وبس، لأ أقدم للناس علم وآخد عليه حقي
العميل : أنا والله يا باش مهندس منسي من نهار ما شفت الشركة بتاعت حضرتك في المؤتمر ده، مش عارف مؤتمر بتاع إيه، دورة تسويق تقريباً باين كان في مدينة نصر
المهندس منسي : آه.. آه…
العميل : وأنا من نهارها يعني لأني كنت سألت على الأسعار حوالين منك يعني فلاقيت منتجاتك إيه، المكن عند حضرتك كويس أسعاره حلوة معقولة، وفي نفس الوقت كان فكرته سهلة، فمن نهارها محتفظ بالكاتلوج بتاع حضرتك أهوت، وبدأت من نهارها قمت مجهز المكان وعملت مكان كويس يعني بس طبعاً إيه وقفت على المكن
المهندس منسي : ماشي
العميل : فهمت حضرتك يا باش مهندس آخد إيه الأول أشتغل فيه؟
المهندس منسي : والله أنا بالنسبة لحركة السوق أنا ما أعرفهاش، أنا أعرف في الصناعة، ولكن إنت عايز تشوف إيه أبسط مكنة يعني أرخص مكنة فيهم اللي هتبدأ تشتغل معاك؟
العميل : أنا عايز حضرتك المكنة اللي تكون مثلاً رخيصة وفي نفس الوقت ما يكونش فيها أعطال لأنه طبعاً إحنا هنا….
المهندس منسي : إنسى الأعطال دي، مادام في شركة المهندس منسي إنسى الأعطال دي لسبب بسيط، لأن إحنا عاملين التصميمات وبعد ما عملنا التصميمات عملنا عليها قطع الغيار بره وبعد كده جمعناه، يعلم ربنا إن أنا جايب 3 مكنات تي إن تي عشان خاطر نصنع قطع الغيار للأسباب… لأن إحنا في السوق دلوقتي بقالنا 8 سنين، فقعد عملت اجتماع مع الناس بتوعنا قلتلهم عايزين يا جماعة إيه المنتجات دلوقتي عشان جيبت مكن تي إن تي أهوه، نشوف المنتجات اللي بدأت تتلف عشان خاطر نبدأ نجهز منها ستوك، صفر
العميل : تمام…
المهندس منسي : طب يا جماعة المواتير الـ… الـ…، صفر، طب نعمل إيه نرجع المكن تاني؟؟!!!!
العميل : لا طبعاً
المهندس منسي : فشوفلي حضرتك إنت دلوقتي في مشروع تعبئة وتغليف السكر، مشروع تعبئة وتغليف الزيت، مشروع تعبئة وتغليف الشاي، نبدأ نتكلم في السكر الأول مثلاً ولا نتكلم في الزيت الأول؟
العميل : لا في السكر الأول
المهندس منسي : ماشي.. مكنة تعبئة وتغليف السكر في نص أتوماتيك وفي أتوماتيك، نتكلم في النص أتوماتيك الأول وبعد كده نخش على الأتوماتيك ،المكنة النص أتوماتيك بتعمل ومعاها تاخد معاها سير لحام ده بيعمل
العميل : سير لحام ده يا باش مهندس اللي هوه أنهي بقى؟
المهندس منسي : بص يا سيدي، في مكنة لحام اللي هي إنت بتشوفها بتلحم وبعد كده تستنى لغاية ما تتلحم وبعد ترفع وتاخد الكيس، لأ إحنا عملنا سير إنت تعبي الكيس السكر وبعد ما تعبي ترمي على السير دوت، السير ده ياخده يلحمه ويرمي الناحية التانية، يبقى إنت ورفت هنا إيه إيد عامله
العميل : آه تمام، بالنسبة للحام
المهندس منسي : آه كمان وفرت وقت، لأنه إنت مثلاً دلوقتي لما كنت بتعبي نص أتوماتيك بتعبي وبعد ما تعبي تديها لواحد الواحد ده يلحم وبعد ما يلحم يروح جاي حاططها، لأ إنت دلوقتي كل العملية إنت دلوقتي تعبي وترمي على السير، السير يلحم ويحط الناحية التانية
العميل : إحنا الأول يا باش مهندس كنا شغالين إزاي؟؟؟ كنا بنعبي يدوي بمعيار مثلاً معين كده، نعبي في حاجة كبيرة واسعة كده يعني، وفي بيبقى واحد قاعد على مكنة بتلحم يدوي بالرجل، يبقى قاعد على كرسي ويتك على رجله يلحم الكيس
المهندس منسي : الواحد ده دلوقتي وفرناه
العميل : تمام
المهندس منسي : ووفرناه بسير اللحام ده، يعني إنت دلوقتي… إنت كنت الأول بتعبي يدوي، لأ دلوقتي وفرت التعبئة اليدوي بدل 3 يبقى واحد بس
العميل : طب اليدوي دي بيبقى في حاجة نزلاله من مثلاً قادوس كده ولا حاجة…
المهندس منسي : آه آدي القادوس وفي حاجة اسمها أوتوفيل عين كده ميزان كده يوزن الكيلو وبعد ما يوزن الكيلو إنت تحط الكيس أول ما هو يشوف الكيس هيروح منزلك الكمية في الكيس، بعد ما نزل الكمية في الكيس تروح إنت ماسك الكيس وحاطه على السير، السير يعمل إيه؟؟؟ السير ياخده يلحمه ويودي الناحية التانية
العميل : مضبوط كده يا باشا، دي بالنسبة للنص أتوماتيك
المهندس منسي : يبقى إحنا اتكلمنا في النص أتوماتيك عبارة عن مكنة نص أتوماتيك وزنية، وزنية، وحط تحت وزنية كام خط كده لأنه في مكيال وفي وزني، أنا اللي عندي وزني
العميل : وزني يعني توزن بالجرام…
المهندس منسي : مش بالجرام الدقة بتاعتها عالية جداً
العميل : تمام.. ماشي
المهندس منسي : الوزنية أعلى بكتير من المكيال
العميل : آه طالما وزنية عشان الواحد يحدد اللي هوه عايزه
المهندس منسي : أيوه… نبدأ بقى نخش على الأتوماتيك في السكر، يعني هنعبي ونغلف السكر أتوماتيك كامل مش هندخل العامل فيه خالص
العميل : طب لحظة يا باش مهندس قبل ما ننزل على الأتوماتيك يبقى كده بتاعها كام بالمصري؟
المهندس منسي : لأ إنت بقى أنا هديلك الأسعار بالدولار، امسك ورقة وقلم عشان المصري دلوقتي بقى محير مش عارفين نوصله، مش عارفين نمسكه كل ما نمسكه يتزفلط مننا، فإنت كل اللي على حضرتك إنك تمسك ورقة وقلم وتكتبها وهتشوف سعر الدولار النهاردة في السوق بكام؟؟؟ وتبدأ تحسبها هتحاسبنا بالمصري ماشي، هتحاسبنا بالدولار ماشي، ولو جبتلنا بالدولار ريحتلنا دماغنا وعملنالك خصم 5% ادنهالك في إدينا، لو جيبتلنا بالمصري يبقى الدولار ب الرسمي بتاع السوق النهاردة، خلاص هنعمل إيه
العميل : تمام كده يا باش مهندس، ماشي يا باشا، خش على الأتوماتيك
المهندس منسي : الأتوماتيك ديت ، تقول يا باش مهندس إيه الوضع بالنسبة للأتوماتيك؟؟؟ أقولك عامل واحد يقدر يشغل 6 مكنات، ولكن إنت مش معنى إن عندك مكنة واحدة عادي، ممكن تاخد مكنة تشغلها، ولكن إنت تقدر تاخد مكنة و2 و3 و4 لغاية 5-6 مكنات ويشغلها عامل واحد ولا حاجة
العميل : عامل واحد بس
المهندس منسي : هنا توفير في العمالة جامد، لأنه مشكلتنا دلوقتي بقت في الأفراد
العميل : العمالة آه
المهندس منسي : العمالة بقت صعبة شوية
العميل : طب باش مهندس بالنسبة لطريقة التشغيل إزاي بقى ما بيتدخلش فيها العنصر اليدوي؟
المهندس منسي : مافيش عنصر خالص، كل اللي عليك تحطلها الحاجة بتاعتها وتحطلها الرول… الأكياس هنا بقى بتبقى رول، هي لوحدها بتفصل الكيس، وبعد ما تفصل الكيس تحطلك السكر جواه، وبعد ما تحطلك السكر جواه تنزلهولك
العميل : طب لحظة واحدة يا باش مهندس، بالنسبة للنص أتوماتيك بيبقالوا أكياس مقطعة لوحدها كده كيلوهات مثلاً
المهندس منسي : آه.. جاهزة
العميل : آه جاهزة، أما ده بيبقى رول وهي بتقطع بقى حسب المقاسات
المهندس منسي : مضبوط آه
العميل : طيب في الحالة ديت هيبقى مثلاً في حد بيحطلها السكر ولا نظام سير يطلع السكر ويقلبه فيها ولا إيه بقى؟
المهندس منسي : الـ إيه؟
العميل : بالنسبة لتعبئة القادوس بتاعها ده، بيتعبى بآلي برده ولا بيتعبى يدوي من فوق؟
المهندس منسي : براحتك عايز تعبي آلي ماشي، عايز تعبي يدوي ماشي، ولكن إحنا عملنا ابتكار خفيف كده عشان خاطر الناس برده عايزه توفر في تكاليف إنشاء المشروع
العميل : تمام…
المهندس منسي : عملنا حاجة اسمها بنك، رسمته للناس وعرفتهم إزاي يعملوه، بنك… بنك، بحيث العربية بتاعتك وهي جايه بدل ما تعتق على الأرض تعتق على البنك ده، البنك ده بموازاة القادوس، فاللي واقف فوق بينزل من البنك ويحط في القادوس، طلعنا المقاس أقصر روحنا عاملين إيه؟؟ رحنا شايلين عجلة خفيفة ورحنا حطيناهالهم في السقف، وعملنالهم حاجة اسمها خطاف، الخطاف ده يعمل إيه؟؟ يدوس على الزرار يروح ساحب الشيكارة يروح رافعها لاصقها فين… يروح رافع الشيكارة فوق، هوه كل اللي عليه يمسك البوز ويفتح الخيط
العميل : تمام.. بس كده
المهندس منسي : بس، هوه مش كان بيمسك الشكارة ويحطلها المناول وبعد ما يحطها في المناول يروح فاتح الخيط؟
العميل : آه صح
المهندس منسي : كل اللي إحنا عملناه عملنا إيه؟؟ خلينا الخطاف أهو في بكرة، البكرة فوق أهي البكرة في إيدي أهي يروح دايس عليها تروح ساحبه الشيكارة رافعها لفوق يروح العامل ماسك بق الشيكارة كده يروح ساحب الفتلة تروح الشكارة كلها محطوطة في القادوس
العميل : مضبوط يبقى عشان ما يشلش بنفسه ويتعب نفسه يعني
المهندس منسي : أيوه
العميل : تمام كده يا باش مهندس، طب البنك ده بيبقى في مستوى القادوس بيبقى مرتفع عن الأرض حوالي مترين ولا حاجة
المهندس منسي : إنت براحتك، إنت كمان بتعمل البنك ده بتعمله اللي هوه الدرابزين بتعمله إيه؟؟ بتعمله إنك تعلي وتوطي براحتك
العميل : طب تمام، طب كده هيبقى لو الارتفاع عندي 4 متر ولا حاجة مش هينفع يتحط العربية تطلع عليه هيبقى صعبة شوية
المهندس منسي : ليه؟؟ ولا صعبة ولا حاجة، إنت اللي بتعمل البنك ده بإيدك، إنت بتعمل الدرابزين ده بإيدك، بتعمله الارتفاع بتاعه براحتك
العميل : يعني ممكن العربية تفضي عليه وبعد كده الواحد يرفعه
المهندس منسي : إنت… لما تيجي هوريلك رسمته، أنا عامل رسمته وإدتوا لناس كتيرة نفذوه، إنت بقى تتفق مع الناس إذا كنت هتعمله ولا لا براحتك
العميل : ماشي يا باشا، طيب إحنا كده بالنسبة اتكلمنا في السكر بالنسبة للنص أتوماتيك والأتوماتيك، طيب أنا دلوقتي عايز أزود كمان حاجة معاهم عشان برده يلم تكاليف المشروع، لو خشينا مثلاً على الزيت، الزيت المكنة بتاعته غالية ولا…
المهندس منسي : بص يا سيدي مكنة الزيت في منها ديسك توب، ديسك توب يعني إيه؟؟؟ يعني حاجة كده تجس بيها السوق، إنت لسه ما تعرفش السوق وعايز تجربه
العميل : آه ماشي، أنا اشتغلت في السكر بس ما اشتغلتش في الزيت
المهندس منسي : آه مكن الزيت ده مكن كتير جداً لسه هبدأ أكرهولك واحدة واحدة، واحدة واحدة، نبدأ مشروع تعبئة الزيت، هتعبي طبعاً في أزايز؟
العميل : آه تمام
المهندس منسي : طيب نقول أول حاجة في الزيت أول مكنة اسمها مكنة الدسك توب، يعني إيه؟؟؟ يعني بتتحط على الترابيزة يعني على المكتب بسيطة يعني القصد منها إنها بسيطة، أد البرنتر بتاع الكمبيوتر كده، دي بتحطها وبتعمل بداية للسوق لو إنت عايز تجرب السوق بتاعك
العميل : تمام دي تمشي معانا زي ما أنا قلت صح كده
المهندس منسي : آه.. تجرب بيها عايز تاخد مكنة 2 ـ 3 تجرب بيها سوقك وتتوكل على الله، المكنة دي بتعمل
العميل : طب دي الحجم بتاعها أد إيه يا باش مهندس؟
المهندس منسي : ما هو أنا قلت لحضرتك أد البرنتر كده
العميل : يعني مثلاً تاخدلها مثلاً كام كيلو مثلاً؟
المهندس منسي : لا عادي عبي عليها من أول 2 مللي لغاية 5 لتر، عبي براحتك
العميل : يعني يتفضى فيها وواحد يعبي
المهندس منسي : بص هي بتعبي تعبي تعبي وأول ما توصل الوزن اللي إنت عايزه تروح عاملالك إيه؟؟ تروح فاصلة، يعني إنت معايرها دلوقتي على إنك إنت مثلاً 250 مللي، هي تعبي تعبي تعبي لغاية 250 مللي وتروح وافقه، طيب عايرتها مثلاً على 3.5 لتر، تروح كاتبلها 3.5 لتر، تروح جايه عند 3.5 لتر وتروح وافقه، روحت إنت معايرها على 5000 مللي يعني 5 لتر…
العميل : تمام.. كده يا باش مهندس تبقى عين واحدة ولا أكتر من عين؟
المهندس منسي : ما هي عين واحدة، أكتر من عين… بص ميزة أخوك إن أنا بعمل إيه؟؟؟ ما بحبش إن أنا أجمع الدنيا كلها ببعضها، إحنا عندنا التكنيكال ضعيف وناس ثقافتها الصناعية ضعيفة فأنا ببسط الحاجة، إنت عايز 2 عين تاخد مكنتين وأعملهملك بدولاب واحد أو زرار واحد
العميل : يعني اللي يبقى قاعد عليهم واحد بس يعني
المهندس منسي : آه.. آه… أجيبلك 10 وأشغلك عليهم واحد
العميل : تمام…
المهندس منسي : مافيهاش مشكلة عندي، قولي أنا عايزها 2 عين أعملهالك 2 عين وإنت واقف أخليهالك 2 عين، قولي عايزها 4 عين أخليهالك 4 عين وإنت واقف
العميل : وممكن تبقى الواحد يبقوا 2 وكل واحدة ….
المهندس منسي : عادي… أعملك 4 مكنات وأروح واخد الكنترول بتاع الـ 3 التانيين وأروح دامجه في واحدة بس، يبقى الأوردر يتاخد من واحدة بس بحيث إنك تشتغل على واحدة بس ينزلك الـ 4 مرة واحدة
العميل : بالنسبة يا باش مهندس السدة بتاعت الأزازة الأتوماتيك منها السدة بتاعت الإزازة هي اللي بتسدها؟
المهندس منسي : الـ إيه؟
العميل : السدة بتاعت الإزازة هي اللي بتسدها؟
المهندس منسي : لأ إحنا كده بتكلم في التعبئة بس
العميل : آه… يعني هي بتعبي…
المهندس منسي : بعد ما نتكلم في التعبئة نبدأ نتكلم في السدة
العميل : آه ماشي
المهندس منسي : آه إحنا كده أول مكنة قلناها إيه الديسك توب، طيب في مكنة تانية بعد الديسك توب حاجة اسمها إنتاجية، في منها واحد نزل، و2 نزل، و4 نزل… واخد بالك إلى ما شاء الله، افرض عازيها 24 نزل، أعملها لك 24 نزل، عايزها 48 نزل… براحتك، كل العملية إن أنا بجمع الوحدات تاني وأركبها، يعني مثلاً دلوقتي أنا بقولك واحد نزل، واحد نزل يعني إيه؟؟ يعني واحدة فتحة
العميل : آه تمام نزلة واحدة كده يعني
المهندس منسي : آه.. 2 نزل يعني إيه؟؟ يعني 2 فتحة، يعني بتعبي إزازتين مع بعض، 4 نزل يعني إيه؟؟ يعني 4 أزايز مع بعض بيتعبوا في آن واحد
العميل : ماشي يا باش مهندس
المهندس منسي : نقول أسعارهم إيه؟ امسك الورقة والقلم، الواحد نزل سعره بتبدأ من وفي منها بـ ، الـ 2 نزل بـ 1 اللي هي بتعبي إزازتين في ضربة واحدة
العميل : أغلى من الواحدة
المهندس منسي : الـ 4 نزل سعرها كام؟؟ الـ 4 نزل سعرها 3
العميل : تمام
المهندس منسي : طيب، نقول بقى الأتوماتيك بتاعتها، في منها 2 نزل وفي منها 4 نزل
العميل : طب بعد إذنك يا باش مهندس لحظة واحدة، اللي إحنا قلنا عليها الديسك توب ديت إيه الفرق بينها وبين النزل ديت؟
المهندس منسي : دي نظام بامب ودي نظام بنتون، الديسك توب ديت بسيطة شوية، أما التانية قوية خدمة شاقة
العميل : آه تمام سريعة مثلاً، ماشي يا باش مهندس
المهندس منسي : نظام بامب يعني إيه؟؟ نظام طرمبة
العميل : آه ضخ كده
المهندس منسي : آه نظام طرمبة، أما دي نظام حقن، حقنة
العميل : آه… حقن، تمام، ماشي يا باشا، طب الأتوماتيك بقى
المهندس منسي : الأتوماتيك بتاعتها في منها 2 نزل وفي منها 4 نزل، الـ 2 نزل بتعمل ، والـ 4 نزل بتعمل ، حبيت إنت تزود في يوم الأيام عدد النزل كل اللي عليك إنك هتاخد الـ 4 نزل وزود براحتك خليها 48 نزل براحتك
العميل : يعني الواحد لو خد الـ 4 يعرف يزود عليها، إنما الـ 2 ما تتزودش
المهندس منسي : لأ كله يتزود، الـ 2 بتتزود، والـ 4 تتزود
العميل : تمام مافيش مشكلة، ماشي، يبقى إحنا كده مثلاً لو خدنا الـ 4 الأتوماتيك النزل، طب هوه يا باش مهندس بالنسبة للأتوماتيك أحسن ولا اللي هي مثلاً اللي هي الديسك توب ولا هي اللي نزلة…
المهندس منسي : لا الديسك توب دي بسيطة عاملنها صغنتوتة كده، إنما لو إنت هتعمل مصنع لو عايز تسمع نصيحتي خد دايماً النص أتوماتيك وبعد كده خليه أتوماتيك لأنه في ميزة تانية في مكنا
العميل : آه.. اللي هي…
المهندس منسي : إن النص أتوماتيك أخليهولك أتوماتيك في يوم من الأيام
العميل : يعني ممكن يتعدل أتوماتيك
المهندس منسي : أيوه… افرض إنت النهاردة ظروفك مش مساعدة، فإنت كل العملية بتقول أنا معايا أجرة عامل ماعييش حق المكنة كاملة الأتوماتيك، ولا أي حاجة بنروح جايبن لك المكنة النص أتوماتيك ونروح مركبينها، بعد كده لما ربنا ييسرلك الأمور وعايز توسع العملية شويه وتكبرها بتقول أنا المكنة النص أتوماتيك اللي عندي عايز أخليه أتوماتيك بقولك هاتهولي وتيجي بعديها بأسبوع تستلمه أتوماتيك كامل
العميل : تمام… طب كده يا باش مهندس إحنا قولنا اللي هي النزل دي اللي هي النص أتوماتيك
المهندس منسي : أيوه.. اللي هي الواحد نزل والـ 2 نزل والـ 4 نزل اللي هي البستمية، خلي بالك المكنة البستمية ديت أعلى دقة في العالم
العميل : تمام.. دقيقة يعني في الشغل
المهندس منسي : دقيقة جداً، لأنه في حاجة اسمها بناء على الحاجات ديت كل ده كلام تعبان ما يعجبنيش، أنا أحب أجيب الحاجة وأنساها
العميل : صح، بدل ما كل شوية تعطل وكده تزهق الواحد وتكره الواحد في الشغلانة
المهندس منسي : آه.. لأ ما تقلقش خالص من النقطة ديت، إحنا بقدر الإمكان…. بقولك 8 سنين مافيش قطعة غيار خالص اتغيرت، 8 سنين
العميل : طب كويس والله
المهندس منسي : طبعاً بخلاف قطع الكهربا دي عادي، أنا بتكلم في الأجزاء الميكانيكية 8 سنين مافيش حاجة اتغيرت، ولا الماتور نفسه اتغير
العميل : آه تمام، ماشي يا باش مهندس، طب إحنا كده يا باش مهندس قلنا السكر والزيت، بالنسبة للشاي، الشاي ده مثلاً برده المكن بتاعه غالي ولا معقول
المهندس منسي : المكنة بتاعته الأتوماتيك بتاعته بتعمل… المكنة النص أتوماتيك اللي تعبيلك السكر هي هي اللي هتعبي لك الشاي
العميل : يعني ممكن الواحد يشتغل على نفس المكنة برده عادي
المهندس منسي : آه.. هي هي اللي هتعبي لك الشاي، أما المكنة الأتوماتيك اللي تعبي لك الشاي دي مكنة تانية مش معقولة هتروح تجيب مكنة حجمها كبير زي دي وتروح معبي عليها شاي، هتبقى عامل زي اللي راح إسكندرية بعربية نص نقل
العميل : آه صح تمام….
المهندس منسي : استنى دقيقة واحدة بس أشوف…
العميل : اتفضل يا باشا
المهندس منسي : فهمتني إزاي، فهنا لما تيجي تشتغل على المكنة الأتوماتيك شاي، تشتغل على مكنة تعبئة الشاي اللي هي عامله الأتوماتيك الكاملة
العميل : طيب المكنة دي تشتغل سكر ولا شاي بس؟
المهندس منسي : تشتغل سكر وشاي عادي، ولكن تشتغل سكر لغاية 350 جرام وبس، إنما التانية السكر اللي هي لغاية كيلو تقدر تعبي عليها الشاي بس يعني حرام لما تشغل مكنة كبيرة زي دي في الشاي
العميل : آه تمام، يعني مثلاً إحنا ممكن نقول في البداية كده مثلاً نشتغل عليها لحد ما نلاقي الشغل يكون….
المهندس منسي : مافيش مشكلة عادي
العميل : طب بالنسبة يا باش مهندس للملح، الملح ممكن يخش برده مع السكر ولا…
المهندس منسي : آه يخش مع السكر عادي مافيش مشكلة
العميل : طيب حضرتك بالنسبة….
المهندس منسي : يخش مع السكر والشاي، مش يخش معاه يعني يتعباه معاه، لأ يخش معاه يتعبى على مكنة الشاي أو مكنة السكر، هي مكنة السكر هي هي بتعبيلك الشاي، هي هي اللي تعبيلك الملح
العميل : تمام… يعني مبدئياً عبال ما السوق يطلب كميات أكتر يبقى الواحد يزود المكن
المهندس منسي : مضبوط آه
العميل : طيب بالنسبة يا باش مهندس لو حبينا بالنسبة للتسويق، مافيش عندكم سوق تسويق عندكم ولا السوق ده طبعاً الواحد يفتح السوق ده بمعرفته؟
المهندس منسي : إنت لو أنا قلتلك إن أنا هسوقلك يبقى بجيب رجلك، وأي واحد يقولك كلمة زي دي قوله كنت فلحت بنفسك
العميل : أيوه صح كان سوق لنفسه
المهندس منسي : بص يا ابن عمي، أصل أنا يعني عندي المكنة وعندي السكر وعندي السوق اللي أنا هسوقهولك، طب ما سوقتش لنفسي ليه؟؟؟!!!!!
العميل : صح كلامك مضبوط يا باش مهندس
المهندس منسي : فهتمني إزاي، فمتخليش واحد يجيب رجلك بكلمة زي دي، أنا بشوف المهازل اللي على النت والكلام الفاضي اللي بيعملوه، بص هوه ربنا سبحانه وتعالى خلقنا وسخرنا لكل واحد لمهنته، يعني أنا بالنسبة لي في علم الهندسة واخد بالك أتحدى واحد في العالم كله قدامي، واخد بالك، ولكن هل أنا لما آجي في علم تاني أفهم تاني… مش هينفع، أنا في علمي أنا كويس، ولكن في علم تاني في علم التسويق مثلاً أو في علم إن أنا أمسك الحاجة دي أعرف أبيعها إزاي، يعني مثلاً أنا دلوقتي عبيتها أعبيها لك فلة، ولكن أركب عربية وأحط الحاجة على العربية وأروح للبقالين وأقوله تاخد سكر وحاجات من دي ما أكملش ساعة….
العميل : لا مش شغلتك دي يا باشا
المهندس منسي : أزهق أمل ممكن أموت فيها
العميل : دي عايزه واحد زيي عنده طولة بال ويتكلم مع التاجر
المهندس منسي : يا راجل واحد صحبي مرة سمعته وهوه بيتكلم مع واحد أنا نفسي اتعصبت واتخنقت، فهي مش شغلتي، معرفش
العميل : تمام.. كل واحد وله شغلته طبعاً
المهندس منسي : آه مش شغلتي معرفش إن أنا أماركت عليها، ما أعرفش أسوق عليها
العميل : تمام يا باش مهندس
المهندس منسي : فكل حاجة وليها حاجة
العميل : طيب حضرتك يا باش مهندس بالنسبة للمواد الخام … إحنا قولنا السكر والزيت.. إحنا قلنا الزيت قلنا ممكن نجيبه منين؟
المهندس منسي : بص ما تسألنيش في حاجة غير الصناعة، أجيب السكر منين؟ أجيب الزيت منين؟ كل الحاجات دي منين أنا ما أعرفش، أنا كل العملية إن أنا أشكر إن عملتلك مكنة مضبوطة 100%
العميل : تمام
المهندس منسي : وعملتلك مواد التغليف مضبوطة 100% بس، ده دوري أنا قضيته
العميل : يعني مثلاً زي ما قلتلي الشاي من المنصورة، الزيت إذا كان في المنصورة تبع المنصورة برده مش جنب السمبلاوين
المهندس منسي : علاقتي العامة بالحاجات دي ضعيفة مش مجالي
العميل : تمام.. تمام يا باش مهندس، عموماً مافيش مشكلة، بالنسبة للحاجات دي إن شاء الله هوصلها بإذن الله، أنا أهم حاجة عندي السكر أنا عارف مصدره يعني، وجربنا منه أهوه، والزيت في مصانع زيت ياما في إسكندرية وفي الحتت ديت، وفي تقريباً يمة المنصورة هحاول أوصلها إن شاء الله
المهندس منسي : ماشي يا غالي
العميل : طب كده يا باش مهندس للحاجات ديت بييجي مثلاً حد من عندكم يركبها لنا ويعرفنا طريقة التشغيل…
المهندس منسي : بتستلم مرتين، بتستلم حضرتك مرة عندنا ومرة عندك
العميل : تمام…
المهندس منسي : وتتدرب مرتين، وتنك وراهم لغاية ما إنت تشغل بنفسك وتقولهم خلاص أنا مش محتاجكم
العميل : كويس، يعني بيبقى في ناس معايا فنيين بيعرفوني إزاي بشغل…
المهندس منسي : طبعاً، مرة عندنا ومرة عندك
العميل : تمام يا باش مهندس
المهندس منسي : وتتدرب مرتين، يعني إنت بتستلم مرتين وتتدرب مرتين، مرة عندنا ومرة عندك، معاك صلاحية إنك تقعد تعيد وتكرر لغاية ما إنت بتشغل بنفسك وتقولهم خلاص أنا مش محتاج حد
العميل : لحد ما أفهم الشغل كله
المهندس منسي : أيوه
العميل : تمام… بس هوه يا باش مهندس في حاجات حضرتك عارضها في الكاتلوج بتاعك عبوات وحاجات من دي، الحاجات دي مثلاً ليها تصنيع عندك ولا ديت حاجات عبوات دي بتاخدوها جاهزة لو عايزين تعبوا فيها حاجة
المهندس منسي : لأ عادي.. عادي لو إنت عايز المصنع أعملهولك عندك مصنع العبوات مافيش مشكلة، طب لو عايز تصنع عندي العبوات بعملك الاسطمبة الأول وبعد ما أعمل الاسطمبة ببدأ أنفذلك عليها العبوات بتاعتك
العميل : تمام.. يعني العبوات لو عايز منها أي عبوات الواحد بياخدها جاهزة ولا في مكن يصنعها لي؟
المهندس منسي : الـ 2 عندي الـ 2، عندي إن أنا أصنعلك العبوات، وعندي إن أنا أديلك.. أعملك المشروع عندك كامل
العميل : تمام… طب العبوات إحنا هنا ما نعرفش خامات بتاعت العبوات ديت…
المهندس منسي : أنا أساعدك وأجيبلك كل حاجة لغاية ما أعرفك القرد مخبي ابنه فين
العميل : آه الله يرضى عليك يا باش مهندس كده تمام
المهندس منسي : يعني أنا بأدي رسالة، بأديلك رسالة، إن أنا أسلمك مصنع شغال من إيه تو زد، من الألف إلى الياء واخد بالك، وأدربك عليه، وأخليك إنت اللي تصنع عبواتك، وتعمل كل حاجة بنفسك
العميل : كلام كده مضبوط يا باش مهندس، تمام كده يا باش مهندس، طب بالنسبة للمكن الأتوماتيك بتقول بالنسبة للعبوات رولات دي، الرولات ديت طبعاً بناخدها برده من عندك ولا بنجيبها من مكان تاني؟
المهندس منسي : عادي عندنا برده لو احتجتها عندنا
العميل : موجودة عند حضرتك دي؟
المهندس منسي : إن شاء الله
العميل : خلاص ماشي يا باش مهندس، معلش أنا تعبت حضرتك وأنا كده يعني هعمل دراسة جدوى للشغل أهوت، وإن شاء الله خلال أسبوع ولا حاجة هكلمك على الواتس برضوا حضرتك عشان ناخد معاد عشان نيجي لحضرتك بإذن الله
المهندس منسي : ماشي يا غالي
العميل : طب هوه حضرتك يا باش مهندس فين حته في القاهرة ولا فين؟
المهندس منسي : إحنا عندنا 3 فروع في القاهرة، عندنا حدائق القبة، مدينة نصر، باب الشعرية، وعندنا فرعين بره القاهرة العبور، و6 أكتوبر
العميل : يعني أقرب مكان لينا بالنسبة لكفر الشيخ يبقى أنهي فيهم؟
المهندس منسي : يستحسن في القاهرة حالياً
العميل : في القاهرة، خلاص ماشي، وفي مكن جاهز نتفرج عليه…
المهندس منسي : آه طبعاً في مكن جاهز وكل حاجة وتيجي تتفرج براحتك، ولو عايز تجيب خامة كمان عشان تجرب وتشتغل ماشي مافيش مشكلة
العميل : تمام كده يا باش مهندس، خلاص ماشي يا باش مهندس، إحنا متشكرين خدنا من وقت حضرتك ياما، بس إن شاء الله هيبقى خير
المهندس منسي : خد راحتك
العميل : الله يخليك يا باش مهندس
المهندس منسي : مع السلامة
العميل : طب بقولك إيه يا باش مهندس بالنسبة للشاي ده اللي بيبقى نظام عبوات صغيرة ديت بتاع الفنادق والحاجات دي بتبقى العبوة، دي برده ليه مكن عندكم؟
المهندس منسي : آه ليه مكنة آه عامله
العميل : تمام كده، ماشي…
المهندس منسي : بتبقى 10 جرام دي
العميل : آه اللي بتبقى صوابع دي، تمام كده يا باش مهندس، ألف شكر يا باش مهندس
المهندس منسي : العفو يا غالي، مع السلامة
العميل : مع السلامة