ماكينة تعبئة الملح من شركة المهندس منسي
ماكينة تعبئة الملح من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
العميل: باش مهندس منسي
المهندس منسي: أيوه
العميل: إزي حضرتك يا باش مهندس
المهندس منسي: الحمد لله
العميل: لو سمحت أنا كنت بستفسر بخصوص ماكينة تعبئة الملح وكده، دي متوفرة عندنا في مصر يا باشا؟ حضرتك بتجيبهالنا لو أنا محتاجها؟
المهندس منسي: موجودة بضاعة حاضرة
العميل: تمام.. طيب بالنسبة دي حضرتك بتعبي لامآخذة دي بتطحن الملح وتجففه وتعبيه لغاية ما يطلع كيس؟
المهندس منسي: لأ بص هوه عملية الطحن بتبقى لوحدها، وعملية التجفيف بتبقى لوحدها، وعملية الطحن بعد كده بتبقى لوحدها
العميل: الطحن الأول وبعدين التجفيف وبعدين بيتعبى
المهندس منسي: تسمع نصيحتي لوجه الله؟
العميل: اتفضل
المهندس منسي: اشتري مطحون جاهز، وعليك بس إنك تقدم القيمة المضافة بتاعتك هي بس التعبئة
العميل: آه
المهندس منسي: لأن إنت لسه نازل المشروع من أوله، هتجفف وتتطحن.. إيه اللبخة اللي إنت هتلبخ نفسك بيها، أنا آسف يعني
العميل: أيوه.. لا.. لا
المهندس منسي: خد مطحون جاهز وبعد كده وعبيه، وأقدم المنتج بتاعك، مشروع التعبئة والتغليف النهاردة ده مشروع قليل، ده أكبر مشروع، دي أهم مرحلة
العميل: أيوه.. أيوه
المهندس منسي: دي أهم مرحلة وأعلى مكسب، يعني إنت النهاردة لما تروح تشتري متجفف مطحون جاهز هتلاقي واخد منك في الطن كام؟؟؟ كلام فاضي حاجة بسيطة، معايا
العميل: تمام
المهندس منسي: احسب سعره قبل التعبئة وبعد التعبئة، يعني إنت كل اللي عليك امسك ورقة وقلم وتروح رايح مثلاً شركة كبيرة زي شركة مصر للملاحات، تروح شركة أميتال وتقولهم يا جماعة أنا هاخد منكم ملح مثلاً أو الملح اللي إنت هتعبي أنا هاخد منكم طن، الطن قبل بكام وبعد بكام؟؟ هيقولك قبل بكذا وبعد بكذا، معايا
العميل: تمام
المهندس منسي: في إيدك أهوه سعر الجملة، هتروح لمين الموزعين، يا جماعة أنا شركة جديدة وعندي أمل إن أكون أعلى شركة في مصر، أو شركة كويسة في مصر، وهعمل وأعبي بما يرضي الله وهعمل منتج حديث جيد هتاخدوا مني، أو تشوف رينج في السوق بكام، رينج سعر الجملة بكام؟
العميل: أيوه.. أيوه.. فهمت
المهندس منسي: شوف رينج سعر التجزئة أو سعر البقال بيبيع بكام عشان ما تلخبطش نفسك، لأ سعر الجملة بكام، بتعمل نفسك إنك رايح تشتري، همه بتوع الجملة ما بيكسبوش كتير على فكرة
العميل: أيوه واخد بالي
المهندس منسي: هوه البقال اللي بيكسب كتير، فإنت دورك مع البقال قليل لأنك هتعمل إيه؟؟ هتشتغل على 2 كاتجري يعني تصنيفين 2، تصنيف مع تاجر الجملة، وتصنيف مع البقال نفسه، يعني هتيجي تجيب عربياتك أو إذا كان عندك موزعين هتوزع على الـ 2
العميل: تمام
المهندس منسي: فهمتني إزاي، هتوزع للبقال أغلى من إنك هتوزع للجملة، لأنه البقال بيحسبها إزاي؟؟ البقال بيقول أنا رحت جيبت من بتاع الجملة بـ 10 جنيه مثلاً، وصرفت مواصلات كام 2 جنيه، لأنه المواصلات النهاردة بقت نار، عشان تعمل حسابك لو ما مش هتعمل حسابها دلوقتي يبقى تعمل حسابها، وصرفت مواصلات 2 جنيه، وقفلت المحل كنت هكسب لو أنا فتحت المحل 1 جنيه، يبقى كده بـ 13 جنيه، طب لو أ/ عبد الفتاح حضرتك يعني جبهولي لغاية عندي بـ 12 جنيه آخد ولا أروح أجيب من الجملة؟؟؟
العميل: آه.. بالضبط
المهندس منسي: هوه بيحسبها كده، نرجع تاني لمرجعنا، إنت النهاردة عايز تعمل المشروع كله من الإيه تو زد، فابن الحلال ابدأ بمرحلة، مرحلة التعبئة والتغليف، بعد ما تعمل مرحلة التعبئة والتغليف اعمل مرحلة الطحن، بعد ما تعمل مرحلة الطحن اعمل….. يعني ابدأ الهرم من تحت، معايا
العميل: تمام.. تمام.. تمام
المهندس منسي: ويعلم ربنا، ربنا بيني وبينك، يعلم ربنا إن أنا بنصحك بما يرضي الله أنا هكسب منك في كل الأحوال، أنا هكسب منك في المطحنة وهكسب منك في التجفيف، وهكسب منك في مكن التعبئة والتغليف، يعني اللي أنا بقول ده تجارياً غلط
العميل: تمام…
المهندس منسي: لكن أنا راجل صناعة
العميل: ربنا يبارك لك يا باش مهندس
المهندس منسي: راجل صناعة، في مجال الصناعة بييجوا يتكلموا بيتكلموا على الفوائد دون الربح، يعني راجل الصناعة يهموا إن الصنعة بتاعته تنجح، لأن إحنا بنقدم رسالة
العميل: تمام..
المهندس منسي: آه مش معناها إن إحنا فاتحين مؤسسة اجتماعية، لأ إحنا بنكسب ولكن نقدم الفايدة الأول للعميل وبعد كده نكسب
العميل: تمام…. طيب مكنة التعبئة والتغليف دي بتعبي وتغلف الـ 2 مع بعض، ولا التعبئة لوحديها…
المهندس منسي: بص وحد الله
العميل: لا إله إلا الله
المهندس منسي: في نوعين من مكن التعبئة والتغليف، في نوع نص أتوماتيك وفي نوع أتوماتيك كامل
العميل: تمام
المهندس منسي: النص أتوماتيك لو الإمكانيات المادية معاك قليلة شويه بتاخد نص أتوماتيك، طب لو الإمكانيات المادية بتاعتك متاحة بتاخد الأتوماتيك كامل طبعاً، تغلب نفسك ليه مع النص أتومايتك؟؟؟!!!
العميل: تمام… طب الأتوماتيك بيعمل كام؟ والنص أتوماتيك بيعمل كام؟
المهندس منسي: النص أتوماتيك بيعمل ، والأتوماتيك بتعمل 6، وأنا بسميلك بالدولار عشان خاطر…. في أتوماتيك كاملة بتعمل ، وفي أتوماتيك كاملة بتعمل 6
بص يا أستاذنا النص أتوماتيك بتعمل ، والأتوماتيك بتعمل ، وفي أتوماتيك بقى بتعمل الكيلو اللي هي الكبيرة بتعمل 6، إنما اللي هي بتعمل لغاية 350 جرام لغاية نص كيلو
العميل: نص كيلو في الإيه بقى؟
المهندس منسي: نص كيلو يعني بتعبي لغاية نص كيلو
العميل: آه… آه… واللي هي أم بتعبي…
المهندس منسي: دي بتعبي لغاية كيلو وربع … طبعاً إنت هتستغرب هوه أنا بقولك بالدولار ليه؟؟ ما بقولكش بالمصري على طول ليه؟؟ لأنه إحنا دلوقتي الأسعار إنت النهاردة بتاكل الفراخ الفراخ بالدولار، النهاردة سندوتش الفول بالدولار، باكو المعسل بالدولار، معايا
العميل: صح.. صح
المهندس منسي: فأنا بسميلك بالدولار ولكن هاخد منك بالمصري
العميل: يعني ممكن معلش يا باش مهندس هسأل حضرتك بس على الحته التانية، إنت قلتلي اللي هي بـ لغاية 750 جرام ولا كام؟
المهندس منسي: بتعمل في الحبوب والحبيبات اللي هي الرز والفاصوليا والمكرونة لغاية 350 جرام، أما في الملح تعمل لغاية 500 جرام
العميل: 350 جرام
المهندس منسي: أيوه
العميل: وفي الملح كام؟
المهندس منسي: 500جرام، ليه بقى؟؟؟ اشمعنى الملح؟؟ لأنه الملح الوزن النوعي بتاعه أعلى، لما حضرتك تجيب نص كيلو ملح وتحطه في كوباية وتيجي تجيب 350 جرام فاصوليا تلاقي الفاصوليا زايدة عن الملح لأن الوزن النوعي بتاع الملح أعلى
العميل: طيب نفس المكنة ممكن أعبي بيها ملح، ممكن أعبي فيها توابل، ممكن أعبي فيها فلفل، كمون، شطة…
المهندس منسي:آه.. آه.. نفس المكنة آه
العميل: طب ما يأثرش عليها ولا هتغير حاجة
المهندس منسي: ولا أي حاجة، اشتغل عادي
العميل: طب لو أنا عبيت ملح، ما يبقاش.. كمون مثلاً، ما يبقاش كارف ملح
المهندس منسي: لأ ما هو إنت لازم تنظف المكنة قبل ما تغير، آه.. لأ لازم تنظفها بيبقى معاك كمبروسر هوا أو فرش أو وات إيفر إنك لازم تنظفها أو تغسلها بالخرطوم
العميل: أيوه ما أنا تكلم عشان كده، عشان خاطر بس الحاجة ما تخشش على بعض عشان السمعة، إنت عارف السمعة بتبقى اهم حاجة
المهندس منسي:آه وبعدين لما تعمل طفرة جديدة وتعمل الكمون بالملح مرة واحدة… تديها لست البيت تقولها هوه إنت لسه هتخلطي خلطهالك أهي خدي بلا غلبة
العميل: دي أفكار هتيجي بعدين
المهندس منسي: إن شاء الله
العميل: ماشي يا باش مهندس، طب ماشي، هكلم حضرتك كده وإن شاء الله إذا كان كده، طبعاً داخل ده ولا مهاش دعوة؟
المهندس منسي: إنت بتستلم مرتين، مرة عندنا ومرة عندك،
العميل: يعني أنا بستلم المكنة بتشتغل
المهندس منسي: آه بتسلم مرتين
العميل: تمام