ماكينات تعبئة مكرونة اتوماتيك ونص اتوماتيك من شركة المهندس منسى

ماكينات تعبئة مكرونة اتوماتيك ونص اتوماتيك من شركة المهندس منسى

العميل: السلام عليكم

المهندس منسى: عليكم السلام ورحمة الله وبركاته

العميل: شركة المهندس منسي

المهندس منسى: أيوه

العميل: كنت عايز أسأل حضرتك على خط إنتاج المكرونة

المهندس منسى: آه

العميل: عامل…

المهندس منسى: إحنا عندنا مكن تعبئة وتغليف المكرونة، أما إنتاج المكرونة نفسها ممكن نقعد مع بعض وندرسها، إنما حالياً عندنا مكن تعبئة وتغليف المكرونة

العميل: دي عامله كام يا فندم؟

المهندس منسى: مكنة تعبئة وتغليف المكرونة في منها نص أتوماتيك وفي منها أتوماتيك كامل، إنت عايز أنهي فيهم؟

العميل: دي كام ودي كام؟

المهندس منسى: نص أتوماتيك بتعمل ، والأتوماتيك الكاملة تعمل

العميل: إحنا لو خدنا ناخد مبدئياً النص أتوماتيك

المهندس منسى: آه

العميل: بس

المهندس منسى: هوه إنت ممكن دلوقتي تبدأ بالتعبئة والتغليف، لو لقيت السوق واكل معاك والدنيا تمام وحلوة ممكن تشتغل على التصنيع

العميل: يعني دلوقتي نبدأ بالتعبئة والتغليف يعني نجيب من المصانع الكبيرة ونعبي قصدك كده؟

المهندس منسى: والله رأيي كده، بدل ما تخش في المشروع كله مرة واحدة، ممكن… بس ده جايز ده رأيي مش مبدأ يعني

العميل: فكرة ممتازة، بدل ما تفتح مشروع ولا قدر الله لو في أي خسارة

المهندس منسى: يبقى النهاردة عندك مكنة التعبئة والتغليف، إنت النهاردة كل العملية إيه؟؟؟ هو التصنيع بياخد ربح، والتعبئة بياخد ربح، إنت كفاية عليك دلوقتي الربح بتاع التعبئة والتغليف

العميل: مرحلة واحدة صح

المهندس منسى: وبعد كده ربنا يسر الأمور ولقيت الدنيا حلوة وماشية نبدأ بعد كده نصنع

العميل: طيب حضرتك مكن التعبئة والتغليف دوت موجودة متواجدة عندك ولا إنت بتستوردها لسه؟

المهندس منسى: لا.. لا موجودة بضاعة حاضرة

العميل: طيب العنوان بتاع حضرتك في باب الشعرية أمام مدرسة الثانوية بنات شارع المنسي

المهندس منسى: آه ده أحد فروعنا، إحنا عندنا حدائق القبة، مدينة نصر، باب الشعرية، 6 أكتوبر

العميل: يعني لو عايز أعمل مقابلة مع حضرتك عشان نخلص في المكنة دي

المهندس منسى: ولا حاجة تيجي تنورني

العميل: في باب الشعرية ولا أي فرع؟

المهندس منسى: أي فرع يعجبك

العميل: طيب خلاص توكلنا على الله،طب إنت ما تعرفش لأنه في ناس بيقولولي في مكن خطوط إنتاج مكرونة بتتعمل محلي، يعني زي ما تقول هنا في الورش عندنا في مصر يعني، مش مستورد، ما تعرفش أي حد بيشتغل فيهم

المهندس منسى: والله يا سيدي أنا أتمنى إن بلدي تبقى أحسن بلد، بس لغاية دلوقتي كل مرة آجي أجرب أفشل، ودائماً وأبداً أروح أصنع بره مصر في الصين لدرجة إن أنا صنعت في الصين وعرضت في الصين

العميل: لا والله

المهندس منسى: ونافست في الصين تخيل

العميل: آه…

المهندس منسى: وفي بلدي مش عارف أصنع حاجة خالص، فبجيب قطع الغيار من الصين وبجمعها

العميل: أيوه.. أيوه الله المستعان

المهندس منسى: إنما أنا أتمنى يعني، هوه أنا يعني أخبط في بلدي عشان أكسب، أتمنى إن بلدي دي تبقى أحسن بلد

العميل: معاك حق

المهندس منسى: بس هوه لغاية دلوقتي أنا ما شفتش غير كلام

العميل: آه… صح، صح

المهندس منسى: بعدين النهاردة اسأل الأول وشوف اسم الشركة، الشركة دي بادية بقالها أد إيه، الشركة دي ليها فروع، ليها كيان، ليها … لها.. لها… مش أي حد يقولك أي كلام تقوله ماشي تجري وراه

العميل: صح معاك حق

المهندس منسى: يعني أصل النهاردة في فرق بين المكنة البضاعة الحاضرة، والمكنة اللي لسه هتتصنع بالطلب، المكنة البضاعة الحاضرة آه دي المكنة، آه، جربهالي كده، طب خد شويه مكرونة أهمت وشغلهم لي

العميل: صح.. صح..

المهندس منسى: إنما بقى لسه البضاعة اللي مش حاضرة دي بقى لسه عاملين نبني قصور

العميل: ما هو أنا بسأل لك عشان كده البضاعة حاضرة، أنا اتصلت بشركة تانية قالولي إنت بتنزل تعمل إنترفيو تسيب عربون في خلال 10-15 يوم آجي… أسيب عربون هوه أنا هشتري سمك في مياه

المهندس منسى: لأ بص هوه في…

العميل: أنا عايز أشوف خط الإنتاج بعنيا كمان، وظروفه إيه، وشكله إيه؟؟؟

المهندس منسى: بص وحد الله

العميل: لا إله إلا الله

المهندس منسى: هوه فيه.. فيه ناس كانوا بيحجزوا عندي مكن وأنا بصنعه لهم برسمه لهم وأصنعه لهم ده بناء على الثقة والتراست، يعني في ثقة في الاسم نفسه، في ثقة…

العميل: صح.. صح..

المهندس منسى: ثقة في الشخص نفسه، الشخص ده عمره ما كل حد، وعمره ما أذى حد، ولو حد خد من عنده مكنة وهوه اتأذى منها ولا حاجة وحب يرجعها يقوله ماشي، عايز أكتر من كده إيه

العميل: صح

المهندس منسى: فالناس هنا في ثقة وفي أمان، بس مش كله، ما هي دي المشكلة، مش كله، نسبة بسيطة جداً اللي تلاقيها محترمة

العميل: صح..،للأسف

المهندس منسى: إنما هنا لما يبقى المكنة بضاعة حاضرة والدنيا تمام أديك بتجرب وتشغل تشغيله، طب علموني، دربوني.. واخد بالك

العميل: صح.. صح..

المهندس منسى: طب ما بعد ما تدربوني طب ما تيجوا تدربوني في البيت كمان، طب ما تدربوا ولادي رخرين بالمرة

العميل: معاك حق هوه ده اللي بيحصل

المهندس منسى: والناس عندنا الفنيين فرحانيين بحاجة زي كده، فرحانين إنهم بيدربوا ده وبيعلموا ده، مش معناها إن همه بيبقوا متقففين

العميل: طب حضرتك إحنا نجيب مكرونة سايبة حضرتك اقترحت مثلاً،ده وجهة نظر

المهندس منسى: وجهة نظر على فكرة محترمة جداً، لأني اقتنعت بيها لأن في ناس تانية قالتلي إنت هات من المصنع…

العميل: آه يعني النهاردة بدل ما أكسب جنيه أكسب نص جنيه، واخد بالك، بس في الآخر أبقى في السيف سايد، لأن النهاردة ما حدش ضامن السوق

المهندس منسى: معاك حق

العميل: ربنا يسهل عملت سوق والدنيا بقت تمام، والسوق اتحرك معايا و.. و.. و… أبدأ بعد كده أشرع إن أنا أعمل مصنع

المهندس منسى: ودلوقتي إحنا هنحط اسمنا بقى على الكيس ولا هنحط إيه؟

العميل: ده حقك عادي، حقك إنك تحط اسمك، هي شركة إريال أول ما نزلت مصر كان عندها مصنع؟

المهندس منسى: لا طبعاً

العميل: كانوا بيعبوا لدى الغير كمان، يعني بيصنعوا فين؟؟ بيصنعوا عند سافو وبرسيل ورابسو والجماعة دول

المهندس منسى: أيوه.. أيوه

العميل: وهمه بيعبوا بس، بعد ما عبوا بس بدأوا يعملوا مصنع

المهندس منسى: أيوه.. واكتسحوا الناس دي كلها ونطوا عليهم،آه بتعمل لنفسك اسم وماركة وتروح تسجلها وتعمل كل حاجة وتمشي إجراءات قانوني يعني

العميل: أيوه.. أيوه.. بحيث إنك تبقى كده مشيت نص الطريق أصلاً

المهندس منسى: آه.. آه.. بدل ما تلبخ نفسك اللبخة السودا دي كلها، لأ، خليك في النص الأول وبعدين ربنا يسهل خد النص التاني

العميل: ربنا يسهل، اسم حضرتك ما تشرفناش باسم حضرتك يا فندم؟

المهندس منسى: المهندس منسي معاك

العميل: إنت حضرتك المهندس منسي؟

المهندس منسى: آه

العميل: حصلنا الشرف والله يا باش مهندس

المهندس منسى: الله يبارك لك يا غالي

العميل: كل سنة وحضرتك طيب، إن شاء الله من غير مقاطعة بعد العيد على طول هيبقى لنا مقابلة مع بعض بإذن الله

المهندس منسى: إن شاء الله

العميل: كتر ألف خيرك، وما أتحرمش على المعلومات القيمة دي وكل سنة وحضرتك طيب

المهندس منسى: كل سنة وإنت طيب

العميل: مع السلامة، في رعاية الله