ماكينة تغليف السكر من شركة المهندس منسي
ماكينة تغليف السكر من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
شفت الإعلان بتاعك على صفحتك
المهندس منسي: آه
العميل: على المكنة بتاعت تغليف السكر
المهندس منسي: آه اتفضل
العميل: هوه أنا جيت فكرت إن فيه معرض وبتاع هنا بص مفيش معرض ها؟
المهندس منسي: إزاي بقى يا راجل إحنا عندنا 7 معارض
العميل: طب فين ده أنا جيت هنا أهوه أنا في باب الشعرية
المهندس منسي: آه دي الشقة الإدارية عشان خاطر دي أول بخت يعني
العميل: آه…
المهندس منسي: إنما لأ ده في عندك في حدائق القبة، وفي عندك في مدينة نصر وفي عندك في العبور، وفي 6 أكتوبر مرتين كمان، يعني في مصنعين في أكتوبر
العميل: أيوه، طيب أنا عايز المعارض عشان أشوف المكن ده
المهندس منسي: من العين دي قبل العين دي
العميل: طب فين بقى المعرض…
المهندس منسي: اطلع على حدائق القبة أو مدينة نصر، وبرده…
العميل: الأقرب
المهندس منسي: هيورولك برده، إنت محتاج مكن إيه؟
العميل: والله أنا عايز أعمل حاجة لسه عايز مكن اللي هي بتاعت السكر والزيت والحاجات دي
المهندس منسي: ماشي همه كله فيه مكن، ولكن لو إنت عايز تتفرج كدهو على المكنة كيلو بكيلو قدامك كدهو اطلع على حدائق القبة، إنما عادي تقدر تشوفها في باب الشعرية بس على الربع كيلو
العميل: لا ربع كيلو لأ ربع كيلو بس
المهندس منسي: ما أنا عارف في كيلو في المخازن، واخد بالك، الصغير بتاعها بتاع الربع كيلو أهو، والكيلو الكبيرة دي بقى أكبر، عموماً اطلع على حدائق القبة هتتفرج على كوكتيل كبير قوي
العميل: هوه صناعة اييه
المهندس منسي: يا باشا ده تصميم مصري وتصنيع قطع الغيار بره في الصين وتجميع مصري
العميل: أيوه، تجميعك إنت
المهندس منسي: إحنا مش عارفين نصنع قطعة غيار، مش عارفين نصنع أي حاجة
العميل: آه طبعاً
المهندس منسي: فاضطرينا نصنع بره ونستخدم المهارة والعلم بس هنا في مصر مش أكتر
العميل: إنت بقالك فترة في السوق ها؟ المكن نفسه
المهندس منسي: بقالي 8 سنين، إنت ما تسمعش عن المهندس منسي ولا إيه؟؟؟
العميل: لأ المكن… لا ما أنا بسمع منك
المهندس منسي: لا.. لا إحنا بقالنا 8 سنين وعندنا فرع في هونج كونج وعندنا فرع في الصين، بيبيع مكن في قلب الصين، يعني إحنا أثبتنا اسم بره ومش عارفين نثبت اسم جوه!!!!
العميل: آه
المهندس منسي: عشان اللي بينصبوا جوه كتير، واللي بينصبوا واللي بيكذبوا جوه كتير
العميل: صح.. صح… طب المكنة الأساسية في مكنة بتعمل 5 ولا هي أكتر حاجة الكيلو ده؟
المهندس منسي: الخمسة في التشغيل إن شاء الله يعني 1/1/2016 هتكون نازلة السوق
العميل: يعني أستنى الـ 5؟
المهندس منسي: براحتك بس الـ 5 مش هتنزل أتوماتيك هتنزل نص أتوماتيك في الوقت الحالي
العميل: طب هتبقى تكلفتها كام
المهندس منسي: تكلفتها إن شاء الله في حدود 4 كده يعني
العميل: طب واللي عندك هنا الكيلو آخرها كام؟
المهندس منسي: 49000… عمرك ما هتلاقي ده لا في مصر ولا بره مصر
العميل: والله أنا ليفت كتير على فكرة
المهندس منسي: آه.. آه ما شكلك كده عمال تلف وتدور ومتردد ومش هتشتري حاجة
العميل: لا.. لا مش متردد ومش هتشتري أنا عايز….
المهندس منسي: لفيت كتير وكونك إنك ما تعرفش المهندس منسي ولا تعرف سمعتي دي تبقى مشكلة
العميل: ما هي المشكلة برده إني أنا عايش بره مش عايش في مصر
المهندس منسي: آه…. عشان كده، إنت كنت فين بره؟
العميل: أنا عايش في أوروبا يعني، بس بقى عايز أعمل حاجة
المهندس منسي: فين؟؟؟
العميل: يعني والله في إيطاليا 12 سنة…
المهندس منسي: ده أنا عايز أفتح في إيطاليا
العميل: أنا في إيطاليا 12 سنة، عايز تفتح في إيطاليا؟
المهندس منسي: آه.. آه أنا كلمت ناس كتير، كلمت 10 أصدقائي محدش بيفيد خالص مش عارف ليه؟
العميل: ما هو إحنا ممكن نفيدك أي حاجة في إيطاليا أفيدك أنا
المهندس منسي: نقعد نحب في بعض هنا وبعد كده نروح همه مكالمتين أو 3 مكالمات وبعد كده العواف
العميل: أنا كنت بجيب قطع غيار أصلاً من إيطاليا وحاجات من إيطاليا بس النصابين زي ما إنت قولتلي كتير، وكنت بنزل قطع الغيار وكنت بنزل حاجات كتير بس شرفا فمتوصلش لحاجة كويسة، فأنا قلت عايز أعمل حاجة في مصر دلوقتي، أبتدي في حاجة وبعد كده أجيب الأدوات والخامات يعني من بره، فاهمني… على فكرة هوه المكن ده موجود بس أنا شفته فعلاً هنا مش عايز وجع دماغ
المهندس منسي: أنا عندي هنا كونتينر مكن مستعمل مجتش نحيته، الفنيين في مصر ضعاف قوي قوي
العميل: طيب المستعمل ما أنا عارف، ما أنا عارف
المهندس منسي: عندي مستعمل عندي كونتير كامل حاطه في المزرعة ما جيتش نحيته
العميل: آه…
المهندس منسي: كان الأول لما كنت فاضي ودماغي فاضية فكنت بقعد أمسك المكنة المستعملة أقعد أشد فيها، دلوقتي ما بقيتش مستهالة، مكنة جديدة النهاردة سعرها أقل من المستعملة
العميل: أنا شفت المكن عندك على النت إمبارح، أنا شفت بس حاجتك إنت إمبارح، بس أنا شفت مصانع تانية وحاجات، فأنا إيه لسه بغير يعني إنت صاحب الحاجات دي، لأن أنا ممكن أستورد الرز والسكر أجيبه أنا من بره
المهندس منسي: إن شاء الله ربنا ييسرلك الأمور، هوه الأخ منين اللهجة بتاعته غريبة كده؟
العميل: أنا من بنها، بس أنا عايش بره كتير يعني زمن طويل
المهندس منسي: يا أهلاً بيك
العميل: يعني 20 سنة
المهندس منسي: دايماً اللي بيبقوا جايين من أوروبا أول كلمة بيقولوها إن إحنا جايين مثلاً من إيطاليا جايين من مش عارف إيه ويقعدوا يحكولك كلمة إيطاليا ما بين كل كلمة وكلمة يروحوا حشرينها كده، إنما إنت أنا جريتها منك جر كده
العميل: أصل أنا مش روحت إيطاليا بس، أنا الحمد لله 25 دولة في العالم أمريكا من ضمنهم، كل دول العالم
المهندس منسي: عشان كده مابقتش فارقه معاك، مابقتش معقد نفسياً
العميل: لا.. لا مش معقد والحمد لله سنة الواحد معرفش يعمل حاجة برده، فاهم، فأنا قلت أبتدي في حاجة ما تكونشي خسايرها مضلعة شوية
المهندس منسي: طب هبعتلك دلوقتي مكان حدائق القبة هتروح هناك هتلاقي الناس بتجمع المكن هناك وهتلاقي الدنيا حلوة يعني، ده مكان التجميع أساساً، يعني هتلاقي عرض وتجميع
العميل: في حدائق القبة ها؟؟
المهندس منسي: آه إنت تتطمن لما تلاقي المكن بيتصنع في مصر معناه إنك هتلاقي قطع غيار متوافرة، معناه اللي الناس اللي بيجمعوا دول همه اللي هيصينوا
العميل: طب بس الأسعار هيبقى فيها كلام تاني ولا إيه؟
المهندس منسي: لا إحنا أسعارنا نهائية إحنا شركة إنترناشيونال، إيه بقى، لو اشتغلوا بالمزاج ما ينفعش
العميل: ماشي ما هو عشان نساعد بعضنا هساعدك في إيطاليا يا باش مهندس
المهندس منسي: أنا أساعدك.. أنا من العين دي قبل العين دي، دي حاجة ودي حاجة، ده شق وده شق
العميل: مافيش مشكلة، بس أنا أقولك الصراحة أنا عايز أشوف الأول حاجة مجزية يعني بتاعت السكر والرز ديت
المهندس منسي: ولا يهمك
العميل: أنا عايز أعمل أي حاجة، أي حاجة إنتاجية
المهندس منسي: صلي على النبي
العميل: عليه الصلاة والسلام
أنا مش في السوق عشان خاطر أقولك ده وضعه إيه، أنا مش محتك بالسوق أنا محتك بالوساطة، المهندس منسي: بالحاجات الوسيطة، يعني أنا تصنيع
العميل: أنا عارف.. أنا عارف ما إنت بتبيع برده ما إنت بتبيع
المهندس منسي: لا الحمد لله حركة البيع عندنا كويسة
العميل: شغاله ها
المهندس منسي: الحمد لله
العميل: عندك كل ماكينات التغليف والحاجات دي؟
المهندس منسي: كلها، مكن التعبئة والتغليف ومكن البلاستيك ومكن الطباعة الروتو
العميل: عندك البلاستيك اللي إيه بقى؟
المهندس منسي: حقن البلاستيك ونفخ البلاستيك
العميل: أيوه.. خلاص يعني في حدائق القبة ممكن أروح وأشوف
المهندس منسي: آه…
العميل: فين بقى في حدائق القبة ولا معروف؟؟
المهندس منسي: هبعتلك الداتا بتاعتهم في رسالة دولقتي حالاً
العميل: أوكيه ماشي
المهندس منسي: ماشي يا غالي
العميل: شكراً جزيلاً
المهندس منسي: مع السلامة
العميل: يا الله مع السلامة